“Stjuartët nuk quhen eksperiment, rolin kryesor e ka klubi pritës”

Partizani reagoi dje i pari në lidhje me dhunën në Korçë. Të kuqtë në reagimin e tyre pranojnë që nuk pajtohen me dhunën, pasi stadiumet duhet të jenë arena feste, por fajin ia kalojnë Skënderbeut, si klubi organizator i ndeshjes. Për Partizanin zhvillimi ndeshjeve pa praninë e policëve nuk quhet eksperiment, pasi është fakt i kryer pas miratimit të ligjit. “Përgjatë ditëve të fundit, klubi Partizani ka monitoruar dhe ndjekur me qetësi të gjitha informacionet e pasqyruara nga mediat e shkruara, portalet, studiot televizive dhe opinionet nga njerëzit e komunitetit të sportit, në lidhje me incidentet e ndodhura në takimin premier të kampionatit, Skënderbeu-Partizani. Saktësojmë se klubi ynë nuk pajtohet kurrsesi me ngjarje të tilla, të cilat prishin imazhin dhe nuk i shërbejnë futbollit të luajtur dhe 'Fair Play'-it në fushë dhe tribuna. Përgjatë gjithë ditëve të fundit, episodet e shfaqura në Korçë janë komentuar si dështim i eksperimentit pa prezencën e forcave të rendit. Fakt është se prezenca e stjuartëve privat në stadium nuk mund të quhet eksperiment nga momenti kur është bërë ndryshimi i ligjit dhe rolin kryesor në mbarëvajtjen e garës e ka klubi pritës. Theksojmë se klubi Partizani për vite me radhë ka zbatuar me rigorozitet dhe korrektësi organizimin dhe mbarëvajtjen e ndeshjeve në kryeqytet, duke mos shënuar qoftë edhe incidentin më të vogël, i cili cenon aktivitetin apo garën sportive. E ritheksojmë, ne si klub nuk pajtohemi kurrsesi me ngjarjet e fundit të ndodhura mes dy tifozërive, ndaj gjithmonë do të mbetemi të hapur për të bashkëpunuar me të gjitha instancat përgjegjëse të përfshira, për një mbarëvajtje sa më korrekte të aktiviteteve sportive. Klubi Partizani e ka për detyrim rikthimin e tifozëve në stadium duke u evidentuar edhe si klubi me mbështetësit më të shumtë në vend. Objektivi madhor i yni është që t'i kthejmë stadiumet në arena argëtimi, pasi sporti luhet për publikun dhe ky duhet të jetë misioni dhe objektivi parësor i çdo klubi. Te Partizani marrëdhëniet klub+tifozëri janë një binom i pandashëm. Falë takimeve dhe kontakteve thuajse çdo javë, pjesë kjo e politikës së klubit, synojmë të përmirësojmë dhe forcojmë gjithnjë e më shumë bashkëpunimin me tifozërinë tonë, e cila është pjesë thelbësore me prezencën dhe mbështetjen pa kushte që i jep skuadrës në çdo ndeshje".