Sezoni nis dhunshëm, presion që në start edhe për arbitrat
Mungon një penallti për Kastriotin në Gjirokastër
Sezoni 2018- 2019 nis dhunshëm në Kategorinë Superiore. Incidentet në ndeshjen hapëse mes kampionëve në fuqi të Skënderbeut dhe Partizanit e ulën shumë imazhin e kampionatit që në start. Megjithatë, 90 minutat e pesë ndeshjeve prodhuan futboll dhe rezultate surprizë, ndërsa nuk munguan në këtë fillim dhe akuzat për arbitrat. Habia erdhi nga Kukësi, që pas ndeshjes me Laçin, të cilën e barazoi 1-1 në "Elbasan Arena", shpalli "non grata" për herë të dytë brenda gjashtë muajve të fundit gjyqtarin Enea Jorgji. "Arbitri Enea Jorgji tregoi edhe një herë joprofesionalizëm, duke favorizuar në mënyrë të hapur ekipin e Laçit, ashtu siç ka vepruar shumë herë të tjera. Shumë qartë, ai nuk dha disa herë goditje dhe faulle për ne, siç ishte dhe rasti i ndërhyrjes së parregullt të Uilliam Kordeiros. Ne do të analizojmë me detaje këtë ndeshje për të nxjerrë dhe përgjegjësitë tona si staf dhe ekip, si dhe do të dërgojmë në Komisionin e Arbitrimit ankimin për këtë arbitër në mënyrë që të mos jetë më gjyqtar në asnjë ndeshje që do të luajë Kukësi", thuhej në deklaratën e klubit kuksian, e cila rezulton të jetë fshirë në faqen e klubit një ditë më pas ( të hënën). Nga pesë ndeshjet e javës së parë pati vetëm një gafë në Gjirokastër, ku iu mohua një penallti Kastriotit nga gjyqtari Indrit Myrtja. Në takimet e tjera nuk kishte momente ku vendimet ndikuan në rezultat.
Kukësi - Laçi 1- 1 Gjyqtarë: E.Jorgji, E.Ganxhi, R.Preça (Elbasan) Edhe pse klubi i Kukësit reagoi ashpër pas ndeshjes, në 90 minutat e takimit të luajtur në Elbasan, nuk ka ndonjë rast flagrant, që të ketë ndikuar në fatin e ndeshjes. Edhe aksionet nga ku erdhën golat, ishin të rregullt. Me sa duket, pasi kanë riparë edhe një herë takimin, te Kukësi mund të jenë bërë pishman për deklaratën e bërë të dielën. Skënderbeu - Partizani 1-0
Gjyqtarë: E. Hamiti (Lezhë), E. Doda, N. Bregasi ( Tiranë)/ pas porte: O. Sokoli, O.Kuka (Tiranë)
8' Hila i rrëmben topin Krasniqit dhe i drejtohet zonës. Sulmuesi i Skënderbeut bën një ndërhyrje ndaj mesfushorit elbasanas dhe
Prognit, duke i rrëzuar të dy brenda zonës. Të kuqtë pretendojnë për penallti, por gjyqtari vijon lojën ( ndërhyrja e Krasniqit është pa top). Moment shumë i dyshimtë.
47' Radas lëshon një top të gjatë në zonën mike për Bregun, i cili pas kontaktit me Ibrahimin rrëzohet. Korçarët pretendojnë për penallti, por gjyqtari vijon lojën ( a kontakt trup me trup). Vendim i drejtë i arbitrit.
90' Bregu i shmanget mbulimit të mbrojtjes së Partizanit, duke e ndjekur
topin e ardhur nga mesfusha. Në momentin e fundit, vlonjati pengohet nga portieri Hoxha dhe gjyqtari Hamiti akordon penallti. Vendim i drejtë i kryesorit. Luftëtari - Kastrioti 0-1
Gjyqtarë: I. Myrtja, M. Dervishi, F. Thorja ( Shkodër)
47' Pas goditjes së Rahim brenda zonës, topi po shkonte në rrjetë, por Rapa e devijon me dorë, teksa kjo tregohet qartë përmes pamjeve filmike. Arbitri nuk akordoi penallti, edhe pse u konsultua me anësorin. Vendim i gabuar si i kryesorit
Myrtja dhe anësorit Dervishi.
58' Xhekson pengohet në zonë nga Lila, por Myrtja vazhdon lojën. Rast i dyshimtë.
69' Bardhi rrëzohet në zonë pas kontaktit me Janiçiç. Arbitri me të drejtë jep 11-metërsh në favor të Kastriotit.
Teuta - Flamurtari 0-0
Gjyqtarët: A. Beqiri, E.Barushi, D.Myftari (Tiranë)
20' Top i gjatë nga Musta në zonë, Hakaj në duel me Torasën, teksa ky i fundit rrëzohet dhe pretendon penallti, por arbitri vijon lojën,
duke vepruar drejt.
45' Torasa hedh një top në zonë, aty ku Osmani mban Bathën dhe ky i fundit rrëzohet. Rast shumë i dyshimtë, me kryesorin që vijoi lojën.
Tirana-Kamza 0-1
Gjyqtarë: A.Koçi, F.Lama (Durrës), D.Rexha (Tiranë)
Takimi i zhvilluar në "Selman Stërmasi" u gjykua nga një treshe mikse me kryesor Andi Koçin. Nuk pati asnjë rast për moviolë, ndërkohë që edhe në deklaratat pas ndeshjes, askush nga palët nuk u ankua për gjykimin.