Çako harron dëmtimin: Jemi ndërtuar për t'u ngjitur
Endrit Çako është gati për sezonin e gjashtë radhazi tek Apolonia. Portieri, pasi ka kaluar tërësisht dëmtimin, jep garanci për kuadratin. "Pata një dëmtim, zgjatje ligamentesh, qysh në fund të sezonit të kaluar, që më mbajti dy muaj e gjysmë larg skuadrës. Por gjithçka ka mbetur pas dhe prej më shumë se 10 ditësh unë kam filluar stërvitjen normale me grupin, madje dhe jam aktivizuar në dy ndeshjet e fundit miqësore. E kemi marrë më shumë se seriozisht garën. Jemi ndër të rrallat ekipe që kemi menduar për sezonin e ri fill pas përfundimit të kampionatit të kaluar dhe gjithçka nisi me organizimin serioz në çdo hallkë: që nga përzgjedhja e stafit teknik, përzgjedhja e lojtarëve, grumbullimi. Por objektivat duhet t'i marrim shtuar. Jemi një skuadër e ndërtuar për Superiore, ndaj do luftojmë fort për t'ia dalë", tha fillimisht ai për "Panorama Sport". Në ekip kanë ardhur këtë sezon edhe dy portierë të rinj: 19-vjeçari Romeo Harizaj dhe 17- vjeçari Renzo Memlika, për të cilët Çako flet pozitivisht. "Janë dy portierë të mirë dhe që punojnë me dëshirë. Harizaj ka qenë pjesë e jona, por shoh që është rritur gjatë kohës së aktivizimit tek Albpetroli. Memlika sakaq është një portier i ri, me shumë pasion, por që i duhet punë për t'u rritur dhe unë vë re që ai ka vullnet të plotë. Ne funksionojmë si grup, kemi marrëdhënie shumë të mira, sepse nuk shohim interesa personale mes nesh, por interesin e skuadrës. Pastaj zgjedhjen e bën trajneri dhe ne do e respektojmë. Mua më vjen mirë që në skuadër kam dy portierë kaq të përkushtuar". Bujar Rama