Festë në Berat, lojtarët e Tomorit futboll me... miset
Vajzat fituan 6-1 në një ndeshje që zgjati 20 minuta
Kemi parë që një ekip futbolli të luajë kundër të burgosurve (siç ndodhi jo më larg se një muaj më parë me Flamurtarin), por që të luhet kundër miseve, kjo nuk ishte dëgjuar. Por vend për çudira nuk ka më, pasi pikërisht dje është u zhvillua një miqësore e rrallë. Tomori mati "forcat" me bukuroshe nga 36 vende të botës, të cilat kanë zbritur dje në qytetin e Beratit për spektaklin "Miss Rainbow of the World". Pjesë e programit që miset kishin për të martë në qytetin e 1001 dritareve ishte edhe një lojë në stadiumin "Tomori", e cila nisi në orën 18:30. Një lojë, në të cilën fituese dolën pikërisht vajzat dhe me rezultat tenistik madje. Megjithatë, vlen të theksohet se lojtarët e drejtuar nga Gersi Arbri nuk u angazhuan maksimalisht, por vetëm sa lëviznin në fushë për t'iu bërë qejfin miseve.
Ndeshja - Kjo nuk është një ndeshje si gjithë të tjerat, ndaj edhe kohëzgjatja nuk mund të ishte 90 minuta. Pjesa e parë, e cila zgjati vetëm 10 minuta, u mbyll me fitoren e bukurosheve me shifrat 3-1. Mis Shqipëria, Greqia dhe Serbia gjetën rrjetat,
ndërsa për Tomorin shënoi Aristotel Koleci. Pjesa e dytë - Miset kanë bërë "tris" edhe në pjesën e dytë. Në këtë 10-minutësh ka pasur vend për një dygolësh të realizuar nga bukuroshja që përfaqëson Letoninë, ndërsa rezultatin final e "vulosi" Kina, duke e mbyllur këtë ndeshje miqësore në shifrat totale 6-1.
Organizatorët - Në një prononcim për gazetën në lidhje me këtë eveniment, organizatorja kryesore u shpreh: "Donim që të shkëmbenim vlerat. Bukuria femërore përballë profesionalizmit të Tomorit. Që në fillim i shpreha dëshirën time kryebashkiakut Petrit Sinaj dhe ai e pranoi me dëshirë të madhe. Ajo që më bëri përshtypje ishte pritja që na bënë tifozët e qytetit të mrekullueshëm të Beratit, ku herë pas here nuk mungonin dhe ovacionet në përkrahjen tonë. Gjithashtu, u pritëm edhe shumë këndshëm nga futbollistët e Tomorit, të cilët pranuan të zhvillonin një ndeshje miqësore sepse ata janë aq xhentilë sa janë meshkujt shqiptarë, duke ua lënë edhe fitoren vajzave". Sakaq, kryebashkiaku Petrit Sinaj tha: "Jemi të privilegjuar që në qytetin e Beratit kishim prezent 'Miss Rainbow of the World'. Janë 35 vajza nga vende të ndryshme, të cilat përfaqësojnë 35 kultura. Në formë simbolike u organizua një ndeshje futbolli me ekipin e Tomorit, por edhe për t'i bërë një reklamë të bukur stadiumit tonë, i cili sapo është restauruar dhe ka kapacitetin e "top 3" stadiumeve më të mëdha në vendin tonë. Krahas kësaj, kjo gjë shërbeu për t'ua bërë akoma më të larmishme ditën vajzave, të cilat u argëtuan pa masë në një eveniment të tillë jashtë kornizës së tyre".