Volejboll, Shqipëria provon shansin në tokë të huaj

Meshkujt luajnë në Kroaci, femrat kundër Zvicrës

Kombëtaret e vole jbollit për meshkuj dhe femra do të zbresin sot në parket për të zhvilluar ndeshjet e treta kualifikuese të vlefshme për Kampionatin Europian. Fillimisht do të jetë skuadra e femrave, ajo që të luajë ndeshjen e saj, ku në orën 17:30 do të ketë përballë kombëtaren vendëse të Zvicrës. Një ndeshje në transfertë shumë e vështirë për vajzat kuqezi, të cilat vijnë në këtë sfidë pas dy humbjeve në po kaq takime të zhvilluara në Grupin B. Skuadra e Altin Martirit do të kërkojë të marrë suksesin e parë në këto eliminatore. Kujtojmë që ky ekip pas suksesit të arritur në edicionin e shkuar të Euroligës, ku zuri vendin e tretë duke fituar medaljen e bronzit, ka kaluar një fazë rinovimi ku shumë lojtare me eksperiencë janë larguar nga kjo skuadër për t'u lënë vendin vajzave të reja. Këto ndryshime janë reflektuar edhe në rezultate, por tashmë jemi vetëm në hapat e para dhe kjo kombëtare po punon më tepër për të ardhmen.

Meshkujt - Pas fitores spektakolare të arritur ditën e diel kundër Austrisë, skuadrën e meshkujve e pret një ndeshje në jashtë fushe përballë Kroacisë. Kuqezinjtë do të matin forcat me skuadrën vendëse sot në orën 20:30. Fitorja e arritur në takimin e fundit kundër Austrisë si dhe triumfi i Portugalisë në Kroaci, ka bërë që gara për vendin e dytë në Grupin D, të jetë shumë e fortë. Ekipi ynë, që drejtohet nga Jovan Melkas, vjen në këtë sfidë me një moral të lartë dhe shpresohet shumë në një rezultat pozitiv, duke parë formën e shkëlqyer që skuadra shfaqi në ndeshjen e fundit kualifikuese kundër skuadrës austriake.