La Liga “burgos” yjet, sa shumë qëndrojnë në pankinë

Barcelona, Atletiko e Reali, 788 mln € në stol

Barcelona dhe Reali i Madridit e nisën La Ligën, duke fituar në ndeshjet e para dhe me shumë ngjashmëri mes tyre. Në fillim nuk e patën të lehtë, por në fund ia dolën të merrnin 3 pikët. Në kampin katalanase, aktivizimi i Kutinjos në pjesën e dytë "ndezi" sulmin e Barcelonës. Por, edhe në Madrid pati shumë yje që qëndruan në stolin e rezervave kundër Getafes. Atletiko u ndal në barazim me Valencian edhe pse këtë herë ka si synim fitoren e titullit kampion si në sezonin 2013- 2014. Interesant është fakti se këto tre ekipe që do të rivalizojnë njëratjetrën kanë forcë të jashtëzakonshme edhe në stol. Në javën e parë të La Ligës, këto skuadra mbajtën në pankinë lojtarë, të cilët në total kapnin vlerën e 788, 5 milionë euro. Barcelona kishte 7 lojtarë në stol me vlerë 314 milionë euro, sipas të thënave të "Transfermarkt". Valverde i konsideroi si alternativa lojtarët si Silesen (20 mln), Lenglet (36 mln), Artur ( 30 mln), Vidal ( 35 mln), Rafinja (28 mln), Kutinjo (120 mln) dhe Malkom (45 mln). Një traditë që për të lënë yjet në stol vitet e mëparshme e ka pasur Reali. Vjet ishin futbollistë si Hames, Morata, Kovaçiç dhe të tjerë. Por, edhe Lopetegui surprizoi në javën e parë, duke lënë në stol lojtarë si Kurtua (65 mln), Varan (80 mln), Kasemiro ( 60 mln), Modriç (25), Vaskez (25), Vinicius (25), Majoral (7.5 mln), të cilët në total kapnin vlerën e 297.5 mln euro. Sigurisht që këto vendime u morën edhe nga fakti që disa lojtarë nuk

ishin në formën e tyre fizike më të mirë pas Superkupës së Europës. Por, këtë sezon edhe Atletiko e Madridit ka një stol shumë të pasur me yje. Diego Simeone la në stol futbollistë si Adan (3 mln), Gimenez (50 mln), Tomas ( 25 mln), Rodrigo ( 25 mln), Vitolo ( 25 mln), Gelson Martins (35 mln) dhe Kaliniç (14

mln). Në total një vlerë e majme: 177 milionë euro. Kjo do të thotë se këto tri skuadra bëjnë ligjin në kampionatin spanjoll dhe do të luftojnë me njëratjetrën për titullin. Sepse kanë në stol miliona euro, ndërsa rivalët e tyre nuk munden kurrsesi të kenë as në fushë ekipe kaq të shtrenjta dhe me vlerë.