Akordi, ikën milioneri Çani
29-vjeçari kthehet në futbollin italian, firmos për dy vite te Viboneze në Seria C
Përfundon dueli i heshtur mes Parti zanit dhe Edgar Çanit, pasi palët më në fund kanë gjetur mënyrën për të ndërprerë me marrëveshje bashkëpunimin. Zyrtarisht, sulmuesi nuk do të jetë më pjesë e "demave të kuq", ku para një viti erdhi në Kategorinë Superiore si një nga goditjet më të mëdha të futbollit shqiptar. Ndonëse pritshmëritë dhe buja ishte e madhe për ish-sulmuesin e Kombëtares, problemet me dëmtimin, pas operacionit të kryer në gju, bënë që Çani të mos e tregonte veten për asnjë çast te Partizani. Prej muajsh Çani kishte dalë jashtë planeve të klubit, por kontrata, që ishte e vlefshme edhe për sezonin aktual, e mbante të lidhur. Të kuqtë përdorën të gjitha mundësitë për ta hequr "qafe", por lojtari ishte stoik për të duruar çdo lloj trajtimi, vetëm e vetëm që të përfitonte atë që kishte shkruar në kontratë. Pas bisedimeve të gjata, duke parë që Çani nuk kishte më mundësi të kthehej tek ekipi i parë, palët kanë rënë dakord që të prishin marrëveshjen. Mësohet se lojtari ka marrë rreth 100 mijë euro nga klubi, shifër kjo që lidhej me detyrime të prapambetura ndaj tij dhe më pas ka rënë dakord që të dalë lojtar i lirë. 29-vjeçari do ta vijojë karrierën në Itali te Viboneze, e cila militon në Serinë C. Mësohet se Çani ka firmosur kontratë dyvjeçare me të njëjtat parametra pagese që pati te Partizani, rreth 20 mijë euro në muaj.
DEKLARATA- Sulmuesi do të rikthehet kështu në futbollin italian, pas një sezoni për t'u harruar në Kategorinë Superiore. Konfirmimin e prishjes së kontratës e ka bërë publik edhe klubi nëpërmjet njoftimit në faqen zyrtare: "Klubi njofton përfundimin e bashkëpunimit me Edgar Çanin. Sulmuesi 29-vjeçar dhe klubi kanë vendosur të ndërpresin me mirëkuptim marrëveshjen mes palëve. Çani ishte pjesë e skuadrës përgjatë sezonit 2017-2018. Klubi i uron
njëkohësisht Edgar Çanit suksese në karrierën e tij sportive". Që pas mospërfshirjes së Çanit për ndeshjet e Europa Ligës me Mariborin, u bë e qartë që sulmuesi nuk kishte të ardhme te "demat". Fanella e tij me numrin 9 fillimisht kaloi te Stefab Nikoliç, që nuk i solli
fat dhe u largua menjëherë. Tani fanellën me numrin nëntë e mban veshur Rubin Hebaj. Shpresohet që 20vjeçari shkodran të thyejë tersin e këtij numri, që i shoqëruan dy poseduesit e fundit te Partizani, Edgar Çanin dhe malazezin Nikoliç.