TeutaTeuta trembtremb Tiranën,Tiranën, Ze MariaMaria “kërcënon”“kërcënon” Dokën:Dokën: NukNuk ështëështë MesiMesi
Durrsakët marrin një barazim të çmuar, Latif “i dënon” sërish me portën bosh
Shumë zhurmë për një pikë. E tillë ishte sfi da mes Tiranës dhe Teutës e luajtur mbrëmë në "Selman Stërmasi", ku edhe pse nuk pati gola, fitoi spektakli. Një ndeshje e bukur me raste për gol dhe me ekipe që më në fund luajnë futboll të hapur dhe me logjikë, por që mbyllet fatkeqësisht në barazim 0-0. Një Tiranë ndryshe, pa droje, por që nuk di të shënojë dhe një Teutë me një rast të artë për gol, shtyllë e traversë, tregojnë qartë se skuadrat dje argëtuan të pranishmit në stadium. Mëkati i vetëm i 90-minutëshit mbetet goli, i cili vazhdon të mos gëzohet si te durrsakët dhe bardheblutë. Janë munduar dje me të gjitha mundësitë, por nuk ia kanë dalë. Edhe eksperimenti i Ze Marias nuk ka sjellë asnjë rezultat, ndërsa Shkëmbi në fund ka qarë rastet e humbura për gol. Një sfidë, e cila kënaqi të pranishmit, për lojën, por zhgënjeu bardheblutë për sa i përket rezultatit. Pesë pikë të humbura që dy javët e para, janë goditje e rëndë për ekipin bardheblu, që veç sulmuesit të golit, duhet të gjejë edhe fitoren e munguar. Sa për Teutën, urime Shkëmbit. Realisht ka ndërtuar një skuadër simpatike...
Ndeshja - Të dy trajnerët, si Ze Maria dhe Bledi Shkëmbi nuk zhgënjyen në parashikimet e para ndeshjes. Për Tiranën një formacion eksperimental me katër mesfushorë dhe dy sulmues. Nga ndeshja e parë në stol janë ulur Daja e Greca për Hasanin e Blazhevskin. Bardheblutë luajnë me dy sulmues të deklaruar. Për sa u përket durrsakëve, Shkëmbi hedh të njëjtin formacion me të cilin luajti një javë më parë me Flamurtarin. Në 10 minutat e para loja është pa emocion dhe nuk ka asnjë rast për t'u shënuar. Tirana luan me frikë, por mundohet të shohë përpara vetëm me anë të kundërsulmeve. Rastet janë të pakta për shënim dhe të dyja skuadrat duan të kapin tjetrën në kundërsulm. Luftojnë fort në mesfushë, ndërsa bardheblutë kanë një epërsi territoriale më të madhe. Shkëmbi largon Kamaranë të dëmtuar, ndërsa nga ana tjetër Tirana mundohet të shtyjë përpara. Pranë golit shkon Teuta, e cila ndalet nga shtylla dhe portieri Abibi, i cili pas disa sigurive grushton një kthim të Osmanit në zonën bardheblu, e më pas Hoxhallari spastron zonë. Menjëherë, në krahun tjetër Kobina i jep një top të artë Hasanit, i cili vetëm para portës del huq. Me këto dy raste, shumë të pastra në fund të pjesës, mbyllet fraksioni i parë i lojës, që gjithsesi nuk është se ndryshojnë rezultatin.
Pjesa e dytë - Në 45 minutat e dyta ka gjithçka në fushën e lojës. Traversa, shtylla, raste të pastra për shënim dhe gabime para portës. Si bardheblutë dhe durrsakët mundohen që të godasin portën dhe kanë raste sporadike. Tirana është më përpara dhe shumë kërkuese në fushën e lojës, ndërsa Teuta rreshtohet më pas. Gjithsesi, rastin e parë drithërues e ka Teuta me Amadu Latifin, i cili i vetëm para Abibit të rrëzuar nuk çuditërisht nuk shënon gol. Çmenden durrsakët, të cilët shohin t'u ikë një rast madh nga duart. Ze Maria shikon që ka probleme dhe zëvendëson Dokën e Karabecin me Kërçikun dhe Grecën. Të dy lojtarët i japin një ritëm tjetër ndeshjes. Në minutën e 74-t, Greca merr krahun e majtë, pasi djeg të gjithë durrsakët, kroson në qendër për Sentamunë, i cili godet me kokë, por vetëm jashtë. situata përmbyset menjëherë dhe brenda 60 sekondave, sërish Teuta mund të kishte shënuar si me Vecajn, i cili godet në mënyrë të kalibruar, por ndalet nga Abibi si dhe Beqja që trondit shtyllën e Tiranës, pas një gjuajtjeje nga jashtë zone. Tirana ka kontrollin e lojës, ndërsa Teuta mundohet të godasë me kundërsulm. Rasti i fundit serioz shënohet në minutën e 84-t me Dorian Kërçikun, që pas një topi të Grecës, godet me kokë, por veterani Isli Hidi bën mrekullinë dhe e mban portën të paprekur. Edhe pse luhen edhe 3 minuta shtesë, sërish rezultati nuk ndryshon. Në fund Tirana e Teuta koleksionojnë raste për gol, shtylla e traversa, por në fund ndajnë nga një pikë. Si njëra dhe tjetra fitoren e parë në kampionat e shtyjnë për javën tjetër...