Milani e bën dramë, përmbyset me tre gola nga Napoli
Zielinski dhe Mertens fantastikë, Napoli përmbys kuqezinjtë në vetëm 15 minuta
Nëse historia e mësuesit dhe nxënësit ishte më e përfolura gjatë javës, arsyeja sot është edhe më e dukshme. Diçka më shumë rreth temës me siguri mund të dijë Gatuzo, që mbrëmë asistoi i pafuqishëm ndaj përmbysjes së Napolit kundër skuadrës së tij: nga 0-2 në 3-3 në më pak se 45 minuta. Milani pa t'i rrëshqiste nga duart një trepikësh, të cilat kishte mundësinë e artë t'i merrte ndaj një rivali që për një orë nuk dha shenja të qarta jete. Përveç pjesës së parë dhe fillimit të pjesës së dytë, djemtë e Ançelotit meritojnë një duartrokitje të madhe, duke dhënë provën e radhës që në futboll duhet besuar vërtet deri sa arbitri të vërshëllejë fundin e takimit.
NDRYSHIME - Ndryshe nga ndeshja e parë ndaj Lacios, i vetmi ndryshim për napolitanët ishte ai i portierit, ku Ospina parakalon Karnezis. Kuqezinjtë nga ana e tyre u shfaqën më shumë të vjetër sesa të rinj, ku fytyra e vetme e re ishe ajo e Gonzalo Higuainit në majën e sulmi, me Gatuzon që preferoi të mbështetej në mekanizma dhe aftësi të njohura. Napoli vinte në ndeshjen e parë sezonale në shtëpi me tri pikë në renditje dhe si një ekip që fiton, pavarësisht ndryshimit të trajnerit, ndërsa Milani përfaqësonte një ekuacion me shumë të panjohura. Skuadra e jugut të Italisë propozoi përsëri një futboll të parashikueshëm dhe pak agresiv, por nëse në Romë shkëndija u ndez menjëherë, mbrëmë u deshën ekzaktësisht 60 minuta për të parë potencialin e frikshëm të djemve të Ançelotit. Pavarësisht nisjes së dobët të Napolit, duhet theksuar se te kuqezinjtë u vu re edhe dora e trajnerit që këtë vit e nis që nga faza përgatitore sezonin. Milani propozon një qarkullim të mirë topi dhe po të mos ishte për gabime teknike individuale, ndoshta sfida mund të kishte marrë një kthesë tjetër. Aksioni i golit të parë të "Djallit", është prej manuali futbolli me Suson që ndërron krah, Borinin që bën spondën dhe Bonaventurën që depërton në zonë dhe mposht portierin rival. Mesfushori përsëri protagonist i një krosi të rrezikshëm, ndërsa pjesa e parë e Napolit është e gjitha në një goditje të rrufeshme të Kajehonit.
ÇFARË PËRMBYSJE! - Me golin e Davide Kalabrias
në minutën e tretë të pjesë së dytë, Milani dha idenë se i vuri një hipotekë ndeshjes, por Zielinski vendos që Napoli nuk e ka thënë ende fjalën e fundit. Polaku përfiton nga një "dhuratë" e Bilas dhe mposht Donarumën. "San Paolo" merr shkëndijën
për zjarrin e madh, të cilin Ançeloti e ndez duke futur Mertens në vend të Hamshik dhe duke ndryshuar modulin nga 4- 3- 3 në 4- 2- 3- 1. Në minutën e 67- të përsëri Zielinski ndëshkon kuqezinjtë nga jashtë zone në zhvillimet
e një goditjeje këndi të fituar nga Elseid Hysaj, ndër më të mirët e Napolit mbrëmjen e djeshme. Higuain mundohet të shkundë të tijtë, por Alan ngjitet në katedër dhe kroson për Mertens që shënon me portën e boshatisur
pas një tentative të Donarumës për të grushtuar. "San Paolo" në festë, ndërsa kuqezinjtë tronditen, sepse të pësosh përmbysjen pas avantazhit të dyfishtë është një leksion i rëndë, pikërisht si ata që mësuesit u japin shpesh nxënësve.