Gega: Hebaj s'ishte në lojë, Partizani vjen pas Kastriotit
Trajneri: E kemi bagazhin për të fituar titullin kampion
Trajneri i Partizanit, Skënder Gega, në intervistën pas ndeshjes për "SuperSport", deklaroi se ekipi i Kamzës e vuri në vështirësi, edhe pse në fund doli me tri pikë. Gega ka mbetur i kënaqur nga paraqitja e Hebajt, por vlerësonte që nuk luajtën mirë në Korçë Asani dhe Progni që e nisën si zëvendësues.
Partizani ndryshoi në pjesën e dytë…
Kamza është për t'u lavdëruar për grintën e tyre. Na vuri në vështirësi në pjesën e parë. Edhe fusha ishte faktor në këtë takim. Duke parë edhe kundërshtarin, ndryshuam edhe në vendosje. Nuk jam i kënaqur në 90 minuta, por kemi shumë për të rregulluar.
Kur do jetë më i lirshëm Partizani në sulm?
E vërtetë, Hebaj sot (dje) nuk ishte fare në lojë. Nuk e di çfarë pati, pasi në stërvitje ka qenë shumë mirë. Fizikisht ka qenë shumë mirë. I duhet pak kohë, pasi në një klub të ri është pak e vështirë. Ekipi shpërdoroi disa raste në pjesën e dytë, por deri fund ishim nën presion.
Jeni i bindur se ekipi i 30 minutave të fundit do jetë Partizani i ardhshëm?
Progni dhe Asani nuk dhanë shumë në ndeshjen me Skënderbeun, prandaj i lashë në stol. Por, jam i kënaqur se tani që patën mundësi e ndihmuan ekipin. Duhet të jemi në lojë për 90 minuta, dhe jo vetëm me fragmente.
Ku e shihni Partizanin këtë sezon, për titull, Kupat e Europës apo për t'i shpëtuar kategorisë?
Tre klasifikime që unë nuk do doja t'i mendoja. Unë si trajner kam pretendimet e mia. Edhe sot u rrezikuam, në Korçë u ndëshkuam në minutën e 91- të. Mendoj se diferencat janë të vogla mes ekipeve. Kamza na vuri në vështirësi, ashtu si Tiranën. Me Kastriotin, dhe më mbas, do e kemi më të qartë se te cili grup do jetë Partizani. Por, ne i kemi bagazhin për të qenë për titull. Nuk duhet të harrojmë që mungonin edhe "Guerrilsat", që janë shumë të rëndësishëm, sepse Partizani nuk është mësuar të luajë në heshtje. Duhet të mbijetojmë që të jemi një grup i frikshëm për të gjithë.