Elbasani-Lushnja mbyllet në “paqe”
Allkanjari u jep avantazhin miqve, por verdheblutë shmangin humbjen falë një... autogoli
lbasani nuk shkon më larg se "X". Miqësorja e luajtur dje ndaj Lushnjës është mbyllur me shifrat 1-1. Edhe pse miqtë shënuan të parët në fundin e pjesës së parë me anë të Allkanjarit, verdheblutë mundën që të "shmangnin" humbjen falë një autogoli të Sulkjes. Duhet thënë që u zhvillua një 90-minutësh mbi nivelin mesatar dhe me ritëm të kënaqshëm nga të dy kampet në fushë. Loja nis më mirë për verdheblutë, të cilët qarkullojnë më shumë topin dhe vihen më në kërkim të golit. Shkëndijën e parë e jep Ukaj nga e majta, i cili godet, por sfera devijohet në këndore nga Bejte. Ndërkohë, Lushnja mendon më shumë të mbrohet dhe të zërë në befasi ekipin vendës,
por hasin vështirësi për të goditur portën e Hasfatisë. Dueli bëhet interesant dhe përqendrohet në mesin e fushës, ku nuk mungojnë as ndërhyrjet e forta nga të dy kampet, duke krijuar idenë se Kategoria e Parë ka nisur tashmë. Përpos dëshirës për të sulmuar, mungojnë goditjet e rrezikshme drejt portave respektive. Megjithatë, atëherë kur mendohej se fraksioni i parë do të mbyllej në barazim pa gola, mendon Allkanjari që t'u japë avantazhin verdhejeshilëve. Ai del i vetëm përballë portierit dhe nuk gabon, duke e dërguar ekipin e tij shumë herë më të qetë në pushim. Në të dytën Elbasani e rrit ritmin dhe vihet në kërkim të golit të barazimit, duke ushtruar presion të vazhdueshëm në zonën lushnjare. Në të 60-ën, Brahimaj merr përsipër një goditje dënimi dhe kroson në zonë, me
topin që përplaset në këmbët e Sulkjes dhe ndalet në rrjetë, duke realizuar kështu një autogol. Ndeshja vijon të bëhet interesante. Pas barazimit është Lushnja që tenton më shumë në fazën ofensive, por nuk gjejnë hapësira për të goditur portën elbasanase.