Shtylla i mohon fitoren Pogradecit përballë Egnatias

Pogradeci dhe Egnatia ndahen në barazim. Një takim që i kalonte kufijtë e miqësores ishte ai djeshmi, ndërsa duhet thënë që loja pati ritëm të lartë dhe sidomos në pjesën e parë. Kjo ndoshta erdhi prej faktit se të dyja ekipet tashmë janë drejt konfigurimit të plotë dhe presin startin e kampionatit. Por, te liqenorët disa prej titullarëve nuk u aktivizuan që në start, pasi trajneri Fetollari kishte menduar t'u jepte një shans të fundit futbollistëve që janë në provë dhe sidomos dy të huajve, Fransis dhe Jusuf. Nga ana tjetër, edhe trajneri Gjonaj ruajti disa titullarë në stol, duke e kthyer këtë 90-minutësh në një miqësore provash. Në minutat e para janë vendësit më të mirorientuar dhe për pasojë kanë disa mundësi, ku sulmuesi Jusuf ka dalë përballë portierit, por në një moment ka goditur edhe shtyllën. Ndeshje e mirë për Egnatian në gjysmën e dytë të fraksionit të parë, atje ku shpeshherë ka dalë para portës së Malit. Ka qenë sulmuesi Bakiasi që disa herë ka qenë pranë golit, ashtu si edhe Canka, i cili është ndihmuar shumë nga loja në krahë dhe për rrjedhojë kanë provuar disa herë me kokë. Me gjithë përpjekjet e të dy ekipeve, pjesa e parë mbyllet pa gola. Në pjesën e dytë, të dy trajnerët kryen shumë zëvendësime dhe kjo uli pak ritmin, megjithatë të dy ekipet ishin kërkues për të gjetur golin, por më kot. Loja u përqendrua më shumë në mesfushë dhe përpjekjet nga distanca nuk sollën diferencën. Romeo Xinxifi

Mali, Përe, Pura, Hysenllari, Lame, Topllari, Osmanllari, Fransis, Jusuf, Berberi, Laçka; ( Liçkollari, Hidri, Blaceri, Hykellari, Çela, Shkullaku, Tërolli, Gjona, Ndoci, Alillari).

Trajner: F. Fetollari

Fadili, Bakiasi, Dino, Koreshi, Broshka, Canka, Rexhepi, Hezige, Baze, Haremi, Ibrahimllari; ( Karakaçi, Ruço, Karepi, Branica). Trajner: V. Gjonaj