Bakaj dhe Hyka, mesazh Panuçit me dy perla
Shënon fluturimthi, por ekipi përmbyset nga 2-0 në 2-3
Në ditët kur nga infermieria vijnë lajme të këqija për lojtarët e Kombëtares shqiptare, nga Amerika vijnë lajmet pozitive. Ai që i dërgon është Jahmir Hyka, i cili ditën e djeshme realizoi një gol mjaft të bukur dhe bëhet kandidat për një ftesë për dy ndeshjet që do të luajë Shqipëria në Ligën e Kombeve, me Izraelin dhe Skocinë. Me Sadikun e Roshin të dëmtuar, Balajn e Cikalleshin jo në formën e tyre më të mirë, 30vjeçari është një alternativë e vlefshme për Kristian Panuçin. Ai ka eksperiencën e duhur për të luajtur me kuqezinjtë, por mbi të gjitha po kalon një formë mjaft të mirë në kohët e fundit në futbollin amerikan. Ky ishte goli i tretë që shënoi Hyka në këtë sezon. Në minutën e shtatë të ndeshjes ndaj Vankuverit, shtatshkurtri hapi siparin e golave me një goditje fluturimthi nga jashtë zone. Por për fatin e tij të keq, pavarësisht se San Hoze dyfishoi rezultatin në pjesën e parë, e humbi ndeshjen sepse pësoi 3 gola në pjesën e dytë. Megjithatë, shqiptari ishte protagonist dhe mori duartrokitjet e tifozëve të tij për paraqitjen. Skuadra e San Hoze e pagëzoi në profilin e "Twitter"-it me nofkën Hykaçu.
PROBLEMET - Sulmuesi 30- vjeçar është gjithmonë i hapur për t'u rikthyer të luajë me kuqezinjtë dhe Panuçi nuk ia ka mbyllur asnjëherë dyert. Madje, ai e grumbulloi në startin e aventurës së tij dhe e aktivizoi në dy ndeshjet ndaj Lihtenshtejnit dhe Maqedonisë në transfertë. Panuçi nuk ka qenë aspak i qetë gjatë kësaj kohe sepse nga lojtarët e repartit të sulmit nuk ka pasur lajme të mira. Ata jo vetëm që nuk kanë gjetur rrugën e rrjetës (me përjashtim të Manajt dhe Llullakut), por mbi të gjitha kanë pësuar dëmtime (Sadiku-Roshi).