Gjimshiti ndal Romën në sytë e Panuçit, Basha debuton me fitore
Seria A u përmbyll në mënyrën më spektakolare për javën e dytë. Pas surprizës së Interit, përmbysjes së Napolit ndaj Milanit, fitores tenistike të Fiorentinës dhe triumfit të Pastër të Juventusit, Roma nuk mori më shumë sesa një pikë përballë Atalantës. Mirëpo, për barazimin u desh shënimi i gjashtë golave. Pastore zhbllokoi shifrat në minutën e 2-të me një gol fantastik të shënuar me një devijim me finte në cepin e portës së Golinit. Nuk zgjati shumë epërsia e vendësve, pasi zikaltrit morën super xhiro dhe përmbysën rezultatin në 1- 3. Kastanje në minutën e 19-të dhe dopieta e Rigonit në minutat e 22-të dhe 28-të çoi në delir futbollistët e Atalantës. Në pjesën e dytë, Roma nuk u dorëzua dhe arriti të barazonte takimin. Florenzi dhe Manolas ishin autorët e golave për skuadrën e Di Françeskos. Në të dy golat u pa një portier në faj, sidomos në të dytin gol, që erdhi në mes të portës së bergamaskëve. Pas kësaj paraqitjeje, Gasperini duhet të rishohë edhe një herë pozicionin e Golinit si titullar, pasi Berisha, në edicionin e shkuar ka qenë një siguri e shtuar në portë. Me barazimin e djeshëm, të dy skuadrat shkuan në kuotën e 4 pikëve. Gjimshiti ishte në fushë si titullar dhe në sytë e trajnerit të Kombëtares, Kristian Panuçi, bëri një paraqitje pozitive. Në përballjen e radhës, Roma do të udhëtojë drejt Milanos për t'u ndeshur me kuqezinjtë e Gatuzos, ndërsa Atalanta do të presë Kaljarin.
Greqi - Migjen Basha ka debutuar në mënyrën më të mirë të mundshme me fanellën e Aris në kampionatin grek. Skuadra e shqiptarit mposhti me rezultatin 0- 3 Lamian në transfertë. Mesfushori i Kombëtares u aktivizua titullar, duke bërë një paraqitje mjaft të mirë. Të 3 golat për skuadrën e Aris u shënuan në pjesën e dytë. Diguni, Garcia dhe Gama ishin autorët e golave, teksa Basha u ndëshkua me karton të verdhë në minutën e 65- të. 31- vjeçari qëndroi për 90 minuta në fushën e lojës. Sfidën e radhës skuadra verdhezi do ta luajë në shtëpi ndaj Ael Larisa.