Safet Gjici: Të kthehet policia ose bojkot kampionatit
Bosi i verilindorëve kërkon nga presidentët e tjerë të bëhen bashkë
Dhuna e shkaktuar mes tifozërive të ndryshme gjatë këtyre dy javëve të startit të kampionatit ka bërë që të reagojë dhe presidenti i Kukësit, Safeti Gjici. Numri një i kuksianëve, në një prononcim në faqen zyrtare të klubit, ka bërë një thirrje të fortë që Policia e Shtetit të kthehet të ruajë sigurinë publike në stadiume, pasi ato private nuk janë në gjendje ofrojnë siguri. "Unë e kam thënë që siguria në stadiume nuk mund të bëhet me polici private. Është e pamundur. Nuk janë pjekur akoma kushtet në Shqipëri dhe tifozëria nuk është ndërgjegjësuar akoma për të pasur siguri me polici private. Është e pamundur. Me Policinë e Shtetit kemi pasur probleme edhe në vitet e shkuara. Nuk janë akoma kushtet e pjekura për të hequr policinë. Zgjidhje është të rikthehet Policia e Shtetit në krye të detyrës sepse ligji e përcakton qartë, që të garantojë sigurinë publike. Aty kemi të bëjmë me njerëz, me tifozë, futbolli është sport masiv. Ka shumë tifozë, vijnë lloj-lloj tifozi. Kemi pasur shumë tifozë në Kukës, vinin në stadium, thyenin stolat, i merrte policia 2- 3, e më pas i nxirrte. Ata përsëri atë punë bënin. Pavarësisht se në Kukës tifozët patën qetësi dhe nuk kishim ato probleme si në vitin e parë, nuk kemi pasur ngjarje të rënda. Por, në përgjithësi kur luajnë ekipet rivale, ato kryesore, do kemi përsëri probleme me sigurinë. Jam dakord që të gjithë presidentët në Shqipëri, ne duhet të bllokojmë kampionatin nëse policia nuk kthehet të ruajë stadiumet. Kemi të bëjmë me sigurinë publike. Jo pafundësisht mund të shkojë kjo gjë, pasi ka kosto edhe policia. Këto ekipe mbahen për njerëzit, sepse në fund ne heqim
dorë nga futbolli dhe nuk ka më futboll", është shprehur në fillim Safet Gjici. E nëse policia nuk kthehet në shkallët e stadiumit, sipas presidentit të Kukësit, duhet bllokuar kampionati.
"Të 10 ekipet e Superligës duhet të bllokojmë kampionatin nëse nuk rikthehet policia. Janë të pafuqishëm edhe
nga ana financiare, është një kosto e madhe, në një kohë që nuk kemi asnjë ndihmë nga shteti për të mbajtur klubet. Zero ndihmë. Gjithçka, shpenzimet i kanë vetëm presidentët. Flas për Superligën, nuk e di për Kategorinë e Parë. Me sa di unë, 99% të ekipeve të Superligës mbahen nga presidentët. Ne investojmë, por asetet
janë të shtetit. Ne mbajmë një aktivitet që ka shumë kosto dhe tani na shtohen edhe kostot e policisë private, dhe nuk është problemi se ja e përballuam 34 ekipe, por nuk realizojmë dot atë që merret përsipër, siguria publike", vazhdon më tej "bosi" i verilindorëve. Gjici, për të argumentuar idetë e tij, i referohet rastit të Korçës dhe apelon që fenomeni është në rritje. Sipas tij, kur të kenë kaluar 1-2 muaj kampionat, e rivaliteti të jetë më i madh, situata mund të kthehet në kasaphanë. "Tifozët kanë pasur sherre me Policinë e Shtetit, jo më pastaj me policitë private. Ata nuk i llogarisin fare privatët. Unë e di se çfarë është sepse e kam pasur vetë si shërbim. E di se sa siguri mund të bëjë një polici private, por me turma masive, ajo nuk është e përgatitur. E patë çfarë bënë tifozët në Korçë. Duhej Policia e Shtetit të stabilizonte gjendjen. Sapo ka filluar kampionati, sepse kur të kalojnë 1-2 muaj, do fillojë të ketë akoma më shumë rivalitet dhe tifozët do të djegin stadiumin. Unë u bëj thirrje kolegëve, presidentëve të klubeve, të mblidhemi, që policia të marrë përsipër sigurinë dhe nëse ata nuk reagojnë, ne duhet të bllokojmë kampionatin", përfundoi apelin Safet Gjici.