Kostiç “frikë” nga provokimet, Shkurtaj në luftë me kohën

Luftëtari kërkon kthesën ndaj Flamurtarit. Mungesa e pikëve në start ka ngarkuar ndjeshëm ekipin psikologjikisht, e megjithatë ka menduar vetë Millosh Kostiç që të kthejë situatën në normalitet. Para se të niste seanca e parë stërvitore, numri një i pankinës së bluzinjve u ka kërkuar lojtarëve që të mbledhin forcat. "Të keni më shumë besim dhe siguri në lojën tuaj, mos bini viktimë e provokimeve të kundërshtarit në asnjë moment", ka qenë ky mesazhi që u ka përcjellë trajneri të tijve. Gjatë stërvitjes që u zhvillua në mëngjes mungonin vetëm Eduart Rroca dhe Vasil Shkurtaj. I pari, sikundër edhe dihet, po vijon terapinë pas ndërhyrjes kirurgjikale, ndërkohë i dyti u la pushim që të mos ngarkohej edhe më shumë pas kontaktimit muskulor që pësoi në fundin e ndeshjes me Laçin. Megjithatë, për sulmuesin ka lajme të mira. Burime pranë stafit mjekësor konfirmojnë se ai, nga sot do t'i bashkohet grupit dhe shanset që të jenë në fushë kundër Flamurtarit janë të mëdha. Por jo gjithçka shkon "vaj" për gjirokastritët, pasi mungesë e konfirmuar është ajo e Xheksonit. Pa të në krahun e majtë të mbrojtjes, stafi teknik është munduar që të gjejë zëvendësuesin dhe nga sa u pa, këtë rol ia vesoi Aurel Demos. STIVI JANKU - Shtatlarti i mbrojtjes së Luftëtarit, Stivi Janku, iu bashkua Luftëtarit merkaton e verës së shkuar si alternativë e rëndësishme. 21-vjeçari i ardhur nga skuadra e të rinjve të Partizanit, duke mos gjetur hapësirë mes titullarëve të Luftëtarit, është huazuar te Bylisi. "Vendosa të përfaqësohem këtë sezon te skuadra e Bylisit, pasi dua të rritem më shumë në aspektin individual. Me punë, përkushtim dhe seriozitet në stërvitje jo vetëm shpresoj, por besoj se do të jap më të mirën për fanellën e ballshiotëve. Si çdo lojtar i ri, edhe unë kam ambiciet e mia sportive. Rikthimi te Luftëtari është synimi im në të ardhmen", tha Janku, i cili i bashkëngjitet në Ballsh Ardit Jaupajt, që gjithashtu kaloi në formë huazimi te skuadra e Kategorisë së Parë. Tomor Shehu