Lushnja harron shijen e fitores
Besëlidhja i likuidon vendësit për 53 minuta, Fetaj dhe Dollani “vulosin” ndeshjen
esëlidhja ka mundur 2-1 Lushnjën në një takim miqësor, të luajtur dje pasdite në stadiumin "Roza Haxhiu". Lezhjanët kanë zhvilluar një ndeshje shumë të mirë, sidomos për nga lëvizshmëria, nga pikëpamja e pasimeve dhe qarkullimi i topit. Ata kaluan në avantazh në minutën e 31-të. Ka qenë një trajektore e bukur e Pashës nga e majta në zonën lushnjare, ku janë gjendur dy futbollistë të lirë, Dollani dhe Fetaj. Më pas, ka qenë Patrik Fetaj, i cili vetëm 34 metra përballë Bejtes ka goditur saktë me kokë duke shënuar për Besëlidhjen. Në fillimet e pjesës së dytë, pikërisht në minutën e 9-të të saj, lezhjanët dyfishojnë shifrat me anë të Armand Dollanit. T.Kamara ka pasuar nga e djathta dhe në krahun tjetër Dollani e ka zotëruar shumë mirë topin e në depërtim e sipër, ka goditur në një pozicion të prirët, duke i dhënë sferës këndin e duhur për ta ndalur në rrjetë. Një gol mjeshtëror dhe Besëlidhja udhëheq 2-0. Lushnja nuk është aty ku duhet dhe për pasojë, rastet për shënim mungojnë. Por, në minutën e 82-të, në zhvillimet e një goditjeje dënimi, Mezini shfrytëzon mjaft mirë krosimin e Haxhiut dhe përcjell topin në rrjetë. Në fund lushnjarët mund të kishin barazuar me anë të Ademit dhe Mezinit,
që humbën secili nga një rast të pastër shënimi. Skuadra lezhjane shoqërohej nga presidenti Gjok Noka, i cili vazhdon të afrojë futbollistë te Besëlidhja, ndërkohë që Lushnja është një ekip që administrohet nga bashkia e qytetit dhe ka ngecur në merkato që prej tri javësh.
ILIR GJYLA
NDRIÇIM KASHAMI