Mziu, për bojkot: Tërheqja e policisë, e parakohshme
Kryebashkiaku: Rëndon arkat e klubeve, të vendoset afat për plotësimin e standardeve
Lidhur me ndryshimin e ligjit, për mospraninë e forcave të policisë në ambienteve të brendshme të stadiumeve, që tashmë do të plotësohen me stjuartë, kryebashkiaku i Kamzës, Xhelal Mziu, që mban peshën e 50% të aksioneve te Kamza, i është përgjigjur pozitivisht thirrjes së presidentit të Kukësit dhe më tej deklaratës së numrit një të Skënderbeut. Sipas tij, edhe ekipi i Kamzës, në rast të mosndryshimit të ligjit, do t'i bashkohet kauzës për të bojkotuar kampionatin. "Besoj se ky është një absurditet që po ndodh në sportin shqiptar. Sporti në Shqipëri është akoma larg standardeve që duhet të ketë për shkak të infrastrukturës dhe mbështetjes financiare. Pastaj, kjo është një kosto shtesë që do të ndikojë negativisht në xhepat e presidentëve apo sponsorëve të këtyre ekipeve. Unë personalisht jam kundër kësaj skeme, edhe sepse stjuartët e kanë të pamundur të ruajnë qetësinë për mbarëvajtjen e një ndeshje futbolli dhe së dyti ka një kosto shtesë për klubet, në të cilat bashkitë janë ende aksionere. Për të garantuar standardet, Policia e Shtetit duhet të jetë prezente në stadiume. Nëse një tifoz është në një stadium që ka kushtet e nevojshme, ai do të sillet korrekt", tha Mziu për "Ora News". BOJKOTI - Lidhur me pyetjen nëse Kamza do të bojkotojë kampionatin apo jo, ai është përgjigjur: "Edhe ekipi i Kamzës do të bëhet pjesë e nismës së disa skuadrave për bojkot. Mendoj se kjo bëhet në të mirë të futbollit. Vendimi për të larguar policinë është ende i shpejtë, pasi mungojnë standardet dhe se Policia e Shtetit është shumë e rëndësishme për të qenë në stadiume. Mendoj se duhet të vendoset një afat kohor ku të jenë krijuar standardet nëpër stadiume dhe mbushja e stadiumeve të ketë kulturën e nevojshme. Edhe ne do të kërkojmë të shkojmë drejt asaj që në impiante të mos jetë e nevojshme prezenca e policisë. Por, për këtë duhet kohë dhe duhen standarde", ka deklaruar kryebashkiaku i Kamzës. Abdulla Dushku