Flet trajneri Ismail Keta: Gjetani, i gatshëm për titullin kampion
Gjetan Keta do të ngjitet në ring në 8 shtator, në Dibër të Madhe, ku do të luftojë për titullin kampion bote "WBU". "Iron Mike" do të duelojë përballë boshnjakut Sladan Janjanin, pasi kundërshtari që ishte përzgjedhur në këtë sfidë, meksikani Paul Venezuela Xhunior, pësoi një aksident dhe u detyrua të tërhiqej. Kështu, Gjetani bashkë me trajnerin e tij Ismailin kanë ndryshuar tërësisht programin, pasi kundërshtari boshnjak ka karakteristika të ndryshme nga meksikani. Në një intervistë për "Panorama Sport", trajneri Ismail Keta tregon gjendjen e Gjetanit dhe premton një sukses në sfidën e 8 shtatorit.
Si është gjendja e Gjetanit aktualisht? Mendoni se në ndeshjen e 8 shtatorit do të jetë në formë optimale? Forma e Gjetanit është shumë e mirë, pasi po stërvitet fort. Të gjithë sportistët stërviten për të pasur duele të tilla ku luftohet për titullin kampion bote, aty ku edhe niveli është shumë i lartë. Jemi të gëzuar që do të luftojmë për këtë titull, por nga ana tjetër ndiejmë edhe një përgjegjësi të madhe. Sidomos tani, që vetëm dy javë para ndeshjes ndodhi përsëri që t'i ndërrohet kundërshtari dhe ne duhet të adaptohemi shumë shpejt me anën taktike dhe teknike për t'u përballur me kundërshtarin e ri. Megjithatë, Gjetani është një profesionist dhe kemi shumë besim që do t'ia dalim mbanë, mbi të gjitha për faktin që ne kemi edhe publikun më të zjarrtë, i cili do të na japë një shtysë të madhe në këtë sfidë, pasi kjo ishte edhe arsyeja që ne zgjodhëm ta zhvillojmë në Shqipëri këtë duel. Sa ka ndikuar ndryshimi i kundërshtarit në planin e përgatitjes për këtë duel?
Ndryshimi i kundërshtarit rrit përgjegjshmëritë dhe ne jemi të detyruar të ndërrojmë komplet mënyrën e përgatitjes teknikotaktike, pasi rivali i ri është një boksier me karakteristika shumë të ndryshme nga meksikani Paul Venezuela Xhunior, por ne jemi të përgatitur dhe kemi shumë besim se do t'ia dalim me sukses. A keni informacion të mjaftueshëm për rivalin e ri, boshnjakun Sladan Janjanin?