Rumenige nuk fshihet: Bajerni favorit i grupit
Shefi i bavarezëve: Jemi të kënaqur me shortin
Portugalia, Holanda dhe Greqia do të jenë destinacionet e skuadrës bavareze gjatë fazës së grupeve. Verdikti i shortit të hedhur në Montekarlo vuri Bajernin përballë Benfikës, Ajaksit dhe AEK-ut. Një grup relativisht i lehtë për skuadrën e Niko Kovaçit që do të ndeshet me tri skuadra që këtë sezon erdhën në fazën e grupeve pasi u kualifikuan nga faza e "playoff"-it. Ajaksi pritet të jetë skuadra më e fortë pas Benfikës që u kualifikua ditën e mërkurë me vështirësi përballë skuadrës së PAOK-ut, edhe pse rezultati final ishte 5-2.
RUMENIGE, I KËNAQUR Ndërkohë, numri një i skuadrës kampione të Gjermanisë, Karl Hainc Rumenige, i cili ishte i pranishëm në hedhjen e shortit, u shpreh se ishte shumë kënaqur me verdiktin e tij. Sipas Rumeniges, skuadra nuk duhet të festojë para kohe, pasi në futboll mund të ndodhë gjithçka. "Është një grup shumë interesant, jemi të kënaqur që shkojmë kështu. Objektivi i skuadrës është të shkojmë në 1\8, por nuk duhet të nënvlerësojmë asnjë nga këto tri skuadra. Nëse do të duam të kualifikohemi për më tej, duhet të fitojmë ndaj këtyre skuadrave që në sezonin e fundit kanë treguar një formë të mirë në kampionatet ku luajnë", u shpreh Rumenige.
DORTMUNDI, HOFENHAIMI
DHE SHALKE GRUPE TË KALUESHME
Borusia e Dortmundit do të ndeshet në një grup me Atletikon e Madridit, Monakon dhe skuadrën belge të Bryzhit. Një grup që nuk duhet të përbëjë problem për verdhezinjtë. Ndërkohë, debutuesit e Hofenhaimit
do të kenë në grup kampionët e Anglisë, ku Pep Guardiola do të rikthehet në Bundesligë. Kundërshtarët e tjerë janë Shaktar Donjesk dhe Olimpiku i Lionit. Shalke mund të buzëqeshë, pasi më shumë se dy skuadrat e tjera, blutë nga Gelsenkirshen do të përballen
në Grupin D me Porton, Galatasarain dhe skuadrën ruse të Lokomotivës së Moskës. Skuadrat gjermane kanë mundësinë të kalojnë në fazën e eliminimeve ku me përjashtim të Hofenaimit, skuadrat e tjera do të përballen me kundërshtarë të një niveli të njëjtë.