Gatuzo: Ky, Milani i vërtetë
Trajneri analizon Romën dhe nënvlerëson Kakanë: Motivohemi vetë
ajtmotivi i Milanit është "Ekuilibër". Normale dhe e drejtë që të jetë ky kushti, me ekipin që ka vetëm 90 minuta ndeshje në këmbë. I pari që e këshillon është pikërisht Xhenaro Gatuzo, që doli i zhgënjyer nga ndeshja me Napolin, por njëkohësisht është i vetëdijshëm për aspektet pozitive që ekipi shfaqi në fushën e "San Paolo"-s për 55 minuta. "Po, dua të shoh skuadrën e pjesës së parë në Napoli, madje atë 55 minutave të para", e nisi fjalën e tij trajneri në konferencë për shtyp, duke shtuar: "Duhet ta nisim pikërisht që aty, për ta zgjatur 90 minuta. Duhet përmirësuar interpretimi gjatë garës, teksa të shtunën mund të them se ishin dy ndeshje brenda njërës. Jemi të rinj dhe nuk mund t'i lejojmë vetes hutime, ndaj nesër (sot) i dua djemtë 95 minuta të përqendruar".
TË PËRVEÇËM - Si gjithmonë, Rino i driblon pyetjet mbi lojtarë të veçantë, por nuk mund të heshtë pas lumit të kritikave në ditët e fundit. "Vazhdoni ta masakroni Bilian, por taktikisht ai mbetet një lojtar thelbësore. Milani nuk ka probleme mbajtjeje topi, e aq më pak në portë. Xhixho bëri më të mirën. Higuain është një tjetër lojtar me peshë në ekip, që na ndihmon të ngrihemi kur jemi nën presion. Ai duhet shfrytëzuar më mirë në 10-20 metrat e fundit. Nuk fajësoj as Bakajokon, më keni interpretuar keq në deklaratat e mia të së shtunës. Jam shumë i lumtur me prurjet nga merkato dhe nëse ka ndonjë fajtor në këtë mes, ai jam unë. E them këtë, sepse lojtari që luan para mbrojtjes (Bilia), është ai që jep ekuilibër dhe unë gabova duke e zëvendësuar aq shpejt. Për më tepër, futa në lojë Bakajokon, të cilin gjatë gjithë javës e kisha provuar në atë rol vetëm në një seancë stërvitore", sqaroi tekniku 40vjeçar. Milani i vërtetë ndoshta ende pritet të vijë, por për Gatuzon sinjalet janë të dukshme dhe për këtë aspekt ai tha: "Mos më pyesni kot për Milanin e vërtetë, unë e pashë ndaj Napolit,
në 55 minuta. Gabova një zëvendësim dhe për atë lëvizje patëm pasoja të rënda, por duhet të kemi të qartë që kur e mbajmë si duhet topin, rivalët vihen në vështirësi të mëdha".
OBJEKTIVAT - Në vija të përgjithshme, Gatuzo mendon se Milani mund të thotë fjalën e vet në sezonin e sivjetshëm, por me deklaratat është disi më i
kujdesshëm. I pyetur mbi potencialin kuqezi dhe shanset për të përfunduar kampionatin mes katër të parave, trajneri sqaroi: "Thonë se teknikisht jemi të aftë për të synuar renditjen 'Champions', por unë mendoj se na mungon aspekti karakterial për të qenë skuadër. Kemi disa skema që mund të përdorim, por i yni nuk është
problem moduli, ndaj duhet të punojmë mbi mendësinë". Afrimi i Rikardo Kakasë në krah të Maldinit dhe Leonados thuhet të ketë stimuluar ekipin, por Rino nuk është dakord. "Nuk duhet të kemi nevojë për legjendat e klubit që të motivohemi. Motivimin duhet ta gjejmë mes nesh, gjatë javës dhe ditën e ndeshjes".