Rikthehet Alvesh, Daja: Flamurtari fiton në Gjirokastër

"Ekipi është rritur në lojë, po tregon personalitet"

Danilo Alvesh rik thehet te Flamur tari. Më pak se dy muaj zgjati aventura e tij në Turqi, pasi braziliani vendosi që të prishë kontratën me Afjet Afjonspor dhe të kthehet në Vlorë. Edhe pse motivet e këtij "divorci" mbeten të paqarta, drejtuesit kuqezinj nuk vonuan dhe i ofruan kontratën e re. Sulmuesi është përfundimisht pjesë e Flamurtarit, pasi po dje është përfshirë edhe në listën e federimeve. Lajmi u publikua ekskluzivisht dje paradite në "Panorama Sport", ndërsa disa orë më vonë ishte klubi që konfirmonte gjithçka në faqen zyrtare, ku shkruante: "Bisha kthehet në shtëpi". Duhet theksuar se në tokën turke ai mori vetëm 49 minuta nga 2 ndeshje dhe kaq mjafton që ai të "digjet" për mer- katon e janarit. Alvesh nuk ka asnjë shans që të firmosë për një tjetër ekip këtë sezon, pasi dy transferime i ka kryer tashmë.

TRAJNERI - Ilir Daja kërkon fitoren në Gjirokastër. Në konferencën e djeshme për shtyp, trajneri deklaroi se nga kjo transfertë është i kënaqur vetëm me tri pikët. "Me Luftëtarin do të jetë një transfertë e vështirë, pasi kundërshtari do të kërkojë të rikuperojë pikët që nuk i ka marrë dot në këto dy javë të para, ndaj do të jenë të motivuar maksimalisht. Por, secili ekip ka objektivat e veta dhe ne i kemi marrë masat për gjithçka. Do të shkojmë me mendjen për të marrë tri pikë, sepse në fund fare ky është edhe qëllimi i Flamurtarit për këtë sezon. Në çdo fushë ne luajmë për fitoren, pavarësisht se çdo ndeshje ka tri rezultate brenda. Përveç Torasës që është me pikëpyetje, për shkak të traumës që pësoi ndaj Kukësit, të gjithë lojtarët e tjerë janë në dispozicion. Udhëtojmë drejt Gjirokastrës për të dhënë maksimumin, në mënyrë që të shkojmë drejt një rezultati pozitiv", shprehet Daja.

ANALIZA - Trajneri analizon edhe dy javët e para të këtij kampionati, teksa thekson se mund të bëhej më mirë në sulm. "Jam i kënaqur për ndryshimin e shfaqur nga java e parë tek e dyta. Jo se në start nuk bëmë mirë, por kemi lënë shumë situata në portën tonë. Rikuperuam me Kukësin, ku ekipi tregoi në të gjitha fazat e lojës më tepër stabilitet dhe personalitet. Kjo është ajo që më kënaq sepse kur është loja, besoj se edhe rezultati do të vijë", theksoi Daja.

MERKATO - Duke u ndalur te merkato, numri një i pankinës evidentoi se duhen plotësuar vendet ku ka pasur mangësi. "Në të gjitha ditët kemi qenë aktivë për të plotësuar ato vende ku kemi pasur mangësi. Ditën e sotme (dje) mund të kemi ndonjë finalizim, pasi na duhet që ta përforcojmë grupin. Kampionati është i gjatë dhe deri në janar na duhet që në dytre pozicione të plotësohemi. Shpresojmë që në këtë hapësirë kohore t'i realizojmë, pasi nëse do të marrim ata që kemi në tratativa, besoj se do të rrisim rivalitetin dhe kur ka konkurrencë, shkohet drejt progresit", përfundoi Ilir Daja.