Shtatë vite pa fituar në Kupë, Elbasani kërkon të th:ejë tersin
Pothuajse në çdo kampionat prestigjioz në Europë, kupa shihet si një mundësi e mirë për ekipet e vogla që të shkojnë sa më lart, pse jo të synojnë edhe Europën nëpërmjet saj. Në Shqipëri ndodh e kundërta, pasi ky kompeticion snobohet qysh në fillim nga ekipet që nuk kanë pretendime dhe pothuajse gjithnjë në fund i shkojnë skuadrat pretendente. Një rast tipik i neglizhencës së kupës është pikërisht Elbasani, një skuadër që e ka fituar dy herë këtë kompeticion në të kaluarën. Mirëpo, u bënë vite që verdheblutë nuk fitojnë dot një ndeshje në këtë kompeticion, duke e braktisur totalisht atë. Verdheblutë kanë plot 7 vite që nuk e kanë provuar shijen e fitores në kupë dhe kjo gjë i përket sfidës me Dinamon në transfertë më 26 tetor 2011, ku fituan në shifrat 2 me 1, me gola të Gavës dhe Tafanit. Në 18 sfidat pasardhëse, elbasanasit nuk kanë fituar më, duke koleksionuar barazime dhe humbje pafund. Përpos kalendarit që mund të jetë treguar i fortë, më shumë ka qenë një neglizhencë e elbasanasve, të cilët duke njohur kapacitetin dhe pamundësinë për t'i shkuar deri në fund këtij kompeticioni, janë dorëzuar që në fillim. Për t'iu kthyer kualifikimit të fundit, kjo gjë ka ndodhur katër vite më parë, me barazimin 2 me 2 në Peqin dhe 1 me 1 në Elbasan përballë Shkumbinit. Edhe pse me gjithë këto statistika negative për verdheblutë, përsa i përket kupës në këto vitet e fundit, ato mund të thyhen nëse Elbasani "thyen" Orikumin të dielën në shtëpi. Përballë ka një skuadër që u ngjit gjithashtu në Kategorinë e Parë këtë sezon, ndaj teorikisht në letër kanë shanset për ta kaluar. Mësohet se do të aktivizohen titullarët, me synimin e vetëm për të kaluar në fazën tjetër, ku do të përballen me Kukësin. Sfida tjetër do të luhet mes Veleçikut dhe Klosit në orën 16:00 në Koplik. Vladimir Mema