Cungu: Zoti dhe Rexhinaldo na nderuan

Armando Cungu, ndryshe nga rryma. Pas ndeshjes, pranon se skuadra e tij e pati të vështirë të fitonte me Tiranën. Fati, Zoti dhe Rexhinaldo sipas shkodranit vendosën lojën. Gjithsesi, trajneri i Kukësit për "Supersport" pohoi se skuadra e tij nuk duhet të fluturojë, por të marrë një nga një ndeshjet. Ja prononcimi i tij në "Gol pas Goli"...

Cinikë sot, tre gola dhe mund të shënonit edhe më shumë…

Në përgjithësi, të fitosh 3- 1 ndaj Tiranës, të gjithë do ishin të kënaqur. Aq më tepër që më në fund arritëm të shënonim. Edhe dy ndeshjet e para i kemi bërë më të mira se kundërshtarët, por kemi shpërdoruar dhe na ka penalizuar finalizimi. Faleminderit djemve dhe Zotit që u zhbllokua Rexhinaldo. Mund të shënonim edhe me rastin e Harbës, por u ngutëm në disa moment. Me pak qetësi, mund ta kapnim kundërshtarin prapa shpine, pasi pika më e dobët e Tiranës është qendra e mbrojtjes.

Çfarë i duhet Kukësit që të jetë për titull?

Kukësit i duhet të punojë shumë më tepër, duhet të jemi shumë më seriozë, më të thjeshtë dhe pak fat, se nuk e kemi pasur me vete në dy ndeshjet e para. Kampionati nuk është i lehtë. Nuk mund të rrish i qetë para asnjë ekipi dhe duhet të jemi shumë seriozë, duhet t'i marrim ndeshjet një pas një. Dy javët e para nuk gabuam në lojë, por te pikët, aty ku ka rëndësi.

Ndeshja ishte shumë e lehtë për t'u fituar. Jeni i surprizuar me Tiranën?

Nëse doni të dini të vërtetën, nuk m'u duk e lehtë Tirana. Në 30 minutat e para, me vendosjen e tyre në fushë, na surprizoi sepse nuk po mbyllnim dot zonat dhe ne ishim nervozë. Erdhi goli dhe u prishën balancat e më vonë, me futjen e Kalasë, arritëm të gjenim ekuilibrin. Tirana u mundua të luante futboll, kishte qarkullim topi, por natyrshëm edhe ata patën defektet e tyre, të cilat ne i shfrytëzuam. Nuk bëjmë mirë të paragjykojmë asnjë ekip. Ka lojtarë që kanë eksperiencë dhe ndoshta i duhet kohë edhe Tiranës. E kuptoj, fillojnë 10 ekipe dhe të gjitha janë për kampion. Duhet të jemi të logjikshëm, t'i japim kohë, pavarësisht dëshirës që kemi për të dalë kampionë. Paçka dëshirës, Tirana nuk është gati për titullin, por jo se është ekip i lehtë. Ju kujtua ndeshja me Laçin kur shkuat 2-1?

Në futboll nuk ka kurrë siguri. Eksperiencat kanë treguar edhe epërsi me 3 gola dhe më pas janë përmbysur. Nuk është e lehtë, duke parë emrin e Tiranës. Patëm një neglizhencë kur shkuam 2-1, pasi kishte edhe shumë minuta, ndaj pata frikë. Fati ynë ishte, sepse shënuam golin e tretë shumë shpejt dhe ndoshta u dorëzua edhe Tirana.