Zbardhet kalendari, Kategoria e Dytë nis me halle

Kampionati nis të dielën, Delvina në hall për fushën

Zbardhet kalendari për Kategorinë e Dytë. U hodh ditën e djeshme në ambientet e Federatës Shqiptare të Futbollit shorti për kampionatin, ku 27 skuadra të 2 grupeve mësuan kundërshtarët vetëm 5 ditë para fillimit të sezonit 2018-2019 (do të nisë këtë të diel, në datën 16 shtator). Edhe pse në fundin e edicionit të shkuar siguroi të drejtën për të qenë pjesëmarrës në Kategorinë së Dytë, skuadra e Rubikut nuk u regjistrua fare. Në kësi kushtesh, Grupi A mbetet me 13 skuadra, ndaj do duhet që njëra prej tyre të jetë 1 javë pushim.

Derbi - Për skuadrat e kryeqytetasit pati short special. Duket qenë se 4 skuadra do t'i luajnë takimet e tyre si pritëse në dy impiante, kalendari për to u përcaktua i veçuar ndër të tjerët, për të evituar edhe përplasjet. Partizani B dhe Internacional do t'i zhvillojnë ndeshjet në "Pezë-Helmes" dhe e njëjta gjë edhe për Tiranën B dhe Kevitanin, që do t'i luajnë përballjet e tyre në "Skënder Halili".

Shqetësimi - Situatë "alarmante" në Grupin B. Delvina nuk ka ku të luajë, pasi stadiumi i saj kohët e fundit po i nënshtrohet një rikonstruksioni. Edhe pse kjo skuadër nuk ka se ku t'i zhvillojë ndeshjet e saj, shpreson se do të arrijë një marrëveshje me Butrintin për t'i luajtur takimet në stadiumin e Sarandës. Për javën e parë të kampionatit u vendos me marrëveshje që Delvina të luajë në transfertë, pavarësisht se shorti përcaktoi që "trojanët" të luajnë ndeshjen e parë në shtëpi përballë Termit. Kjo gjë do të kompesohet në fazën e dytë, teksa Termi do të udhëtojë në transfertë. Situata duket tepër shqetësuese, për faktin se nuk dihet çfarë do të ndodhë në rast se Delvina nuk gjen një impiant. Një opsion mbetet fusha e Memaliajit,

gjithsesi priten me mjaft interes zhvillimet në ditët e ardhshme në lidhje me këtë problem.

Rokada - Për sa i përket ndarjes së grupeve, u përfol për një rokadë mes Termit dhe Sopotit. E megjithatë, gjithçka mbeti në kuadrin e një dëshire. Drejtuesit e federatës zbuluan se kjo marrëveshje nuk u arrit, e në kësi

kushtesh Termi i Tiranës do të vazhdojë të garojë në Grupin B, ndërsa Sopoti në Grupin A. Për sa i përket Divjakës, për të cilën pati zëra se mund të zëvendësonte Rubikun e paregjistruar, kjo gjë nuk u arrit. Bien shpresat edhe skuadrës myzeqare nuk i mbetet gjë tjetër veçse të militojë në Kategorinë e Tretë edhe sezonin e ardhshëm. Pati dhe nga ato skuadra që kërkuan shtyrjen e fillimit të kampionatit me pretekstin se nuk janë ende gati, për shkak se shorti u hodh vetëm 5 ditë para startit të kampionatit dhe koha nuk është e mjaftueshme për përgatitjet, por kjo gjë nuk u mor parasysh nga drejtuesit e FSHF-së, të cilët i qëndruan korrekt datës së paracaktuar.