Kashami: Duam të kalojmë turin

Besëlidhja të mërkurën pret në shtëpi Erzenin, një skuadër me të cilën ka rreth 90 vite që ndeshet zyrtarisht në të dyja kompeticionet, kampionat dhe Kupë. Skuadra nën drejtimin teknik të kavajasit Ndriçim Kashami të martën pasdite iu dha fund përgatitjeve për llogari të sfidës anti-Erzen, ku pretendohet fitorja. Trajneri Ndriçim Kashami, gjatë një bisede për "Panorama Sport", shpreh ambiciet e tij për kompeticionin e Kupës. "Pas një starti të suksesshëm në kampionat, shumë shpejt nisim edhe kompeticionin e Kupës, vetëm dy ditë pas kampionatit, një aktivitet zyrtar që është po aq i rëndësishëm sa kampionati për nga rëndësia, por jo nga objektivat. Shorti na vë përballë Erzenit, një skuadër e nivelit tonë si kategori, por edhe serioze dhe pretendente ashtu si edhe ne. Sfidën ndaj Erzenit e kemi vlerësuar maksimalisht, pasi duam patjetër që ta kalojmë këtë tur. Kjo, për të pasur mundësinë për t'u ndeshur me skuadra të Superiores dhe konkretisht, sipas kalendarit, na bie që të ndeshemi me Skënderbeun, kampionin në fuqi, e cila na vlen për të testuar skuadrën në këtë nivel vështirësie. Skuadrën e kam të kompletuar dhe kjo do më lejojë që të testoj edhe futbollistë të tjerë që nuk u aktivizuan ndaj Burrelit. Pavarësisht dëshirave apo ambicieve tona, gjithçka do të flasë konkretisht në fushën e blertë. Në një futboll të masivizuar ku diferencat janë shumë të vogla mes skuadrave sfiduese, fitorja përcaktohet nga shkalla e gabimeve, ndaj edhe unë këtu jam i përqendruar kryesisht", kështu e mbylli bisedën e tij për gazetën trajneri i Besëlidhjes, Ndriçim Kashami. P.Gjikola