Teqja: E eliminojmë Besëlidhjen

Nga fitorja të dielën e kaluar në Shijak me Ilirinë në javën e parë të kampionatit, Erzeni ka filluar stërvitjet për t'u ndeshur sot në Lezhë me Besëlidhjen për Kupën e Shqipërisë. Lidhur me këtë ndeshje, mbrojtësi kyç tek Erzeni, Mario Teqja, autori i golit të fitores me Ilirinë, flet për "Panorama Sport". "Fillimisht dua të shpreh gëzimin që kemi ndierë pas fitores me Ilirinë. Për mua qe disi e veçantë, sepse goli im i dha fitoren skuadrës, së cilës i detyrohet ky sukses në javën e parë, madje duhet të ishte me rezultat më të thellë. Tashmë, që nga e hëna e kemi harruar ndeshjen me Ilirinë dhe kemi filluar përgatitjet, fillimisht për ndeshjen e parë për Kupën e Shqipërisë në transfertën me Besëlidhjen, e në ditët në vazhdim për takimin tjetër të vështirë në transfertën me Korabin. Edhe në takimin e nesërm (sotëm) me Besëlidhjen, skuadra udhëton me motivin e vetëm për një rezultat sa më pozitiv, sepse ky është dhe motivi ynë gjatë gjithë kampionatit, për të luajtur në çdo ndeshje vetëm për fitore. Skuadra ka kapacitetet për të përballuar me sukses dhe ndeshjen me Besëlidhjen, duke e vlerësuar maksimalisht këtë aktivitet të rëndësishëm pas kampionatit. Te futbollistët vihet re një mobilizim edhe për këtë ndeshje, ashtu siç u paraqitëm edhe në takimin me Ilirinë", përfundon mbrojtësi energjik i Erzenit, MarioTeqja. Erzeni është një nga skuadrat që sezonin e shkuar luftoi shumë për të qenë në Superiore, por si ata dhe Egnatia e patën të pamundur t'i bënin ballë Kastriotit, që sezonin e shkuar drejtohej nga shkodrani Samuel Nikaj. Shijakasit pretendojnë edhe këtë sezon, ndonëse është Vllaznia skuadra favorite për të fituar grupin ku merr pjesë Erzeni. F. Shehu