Tomori kontakton Devollin, nisin bisedimet për stolin

Ish-trajneri i Kamzës kandidat, sot do takohen

Tomori nis kërkimet për pasardhësin e Gersi Arbrit. Dorëheqja e çuditshme e trajnerit ka gjetur të papërgatitur klubin. Të vendosur para kësaj situate, beratasit kanë nxituar që të studiojnë kandidatët e parë. Dhe nga sa duket, Bledar Sinella nuk është i vetmi opsion për këtë post. Drejtuesit kanë nisur negociatat edhe me Bledar Devollin. Trajneri i shkarkuar nga Kamza pas javës së tretë të Kategorisë Superiore ( ku grumbulloi 4 pikë, pas një fitoreje, humbje dhe barazimi), konsiderohet si i duhuri nga klubi. Për këtë motiv ata kanë nxituar edhe për ta kontaktuar. Burime tejet të sigurta për "Panorama Sport" konfirmojnë se dje pasdite ishmbrojtësi i Luftëtarit, Tiranës dhe Flamurtarit ka biseduar me përfaqësues së Bashkisë Berat. Palët mësohet se kanë folur edhe për pjesën e financave. Ende nuk mund të thuhet me siguri, nëse gjirokastriti do të pranojë apo jo ofertën e beratasve, megjithatë kjo histori mund të marrë zgjidhje që sot, kur është rezervuar një takim kokë më kokë mes palëve. Nuk ka informacione për zhvillimet apo bisedat që mund të jenë kryer, mirëpo një "goditje" e tillë në pankinë do të ishte ideale për realizimin e objektivave. Gazeta ka pyetur zyrtarisht drejtuesit më të lartë të Tomorit, për ta pyetur për këtë çështje dhe ata shkurtimisht thanë: "Ende nuk mund të flasim me emra konkretë për sa i përket drejtimit të skuadrës. Ne po shikojmë të gjitha opsionet e mundshme dhe më pas do të bëjmë zgjedhjen tonë".

Kupa - Seanca e djeshme është zhvilluar nga zv.trajneri Klemend Agalliu, ku në krahë ka pasur dhe trajnerin e të rinjve, Iken Drobonikun. Stërvitja është kryer si zakonisht, teksa sot Tomori do të përballet me Bylisin për Kupën e Shqipërisë. Ky takim mendohet të drejtohet nga dyshja AgalliuDroboniku. Eris Sylyku