Fetollari: Erdhi shansi i të rinjve, të tregojnë veten

Pogradeci do të presë Apolonisë për llogari të turit të parë të Kupës së Shqipërisë. Liqenorët vijnë pas një fitoreje shumë bindëse në kampionat, duke mundur një pretendent si Besa. Por, nëse në Kategorinë e parë kanë objektiva të qarta, e njëjta gjë nuk mund të thuhet për kompeticionin e dytë më të rëndësishëm në vend. Në kësi kushtesh, stafi teknik ka menduar që sot ndaj fierakëve t'u japë një mundësi për të rinjtë. Për futbollistët e stolit ky do të jetë një shans i artë, pasi një performancë e mirë, mund t'u shërbejë për të bindur trajnerin për një vend titullari për pjesën e mbetur të kampionatit. "Në ekip ka një konkurrencë të dukshme, pothuajse të gjithë futbollistët duan një vend në formacionin e parë dhe kjo është shumë pozitive. Tani do e kenë këtë mundësi, ndaj le të tregojnë veten në Kupë kundër Apolonisë. Është mundësia e tyre më e mirë. Ndërkohë që edhe unë jam më i qetë për të evidentuar e pse jo edhe më të mirët e stolit. Ne do të luajmë fort, por gjithnjë me vështrim, me shumë pretendime nga kampionati", u shpreh për "Panorama Sport" numri një i pankinës së Pogradecit, Festim Fetollari. Në fakt, te pogradecarët është e vështirë të bësh diferenca mes lojtarëve që janë për gati për të qenë titullarë, pasi rivaliteti vjen edhe nga stoli dhe ka shumë futbollistë edhe pse të rinj që janë të talentuar. Ndaj 90 minutat që do zhvillohen sot në "Gjorgji Kyçyku", do të shërbejnë për të krijuar një ide më të qartë. Gjendja psikologjike te pogradecarët është shumë e mirë. Romeo Xinxifi