Hënes: Pasardhësi im duhet ta dashurojë Bajernin

I klubit gjerman flet për të ardhmen dhe synimet e tij pas largimit

Në Bavari nuk njihen vetëm për sukseset e klubit të Bajernit në futboll, por edhe për ato të skuadrës së basketbollit. Uli Hënes ka folur për një revistë që merret pikërisht me temat e një prej sporteve më popullor në botë pas futbollit. I pyetur për preferencat e tij se kush do të ishte i duhuri për të qenë president i klubit kampion të Gjermanisë kur ai të largohet, Hënes iu përgjigj: "Sigurisht, dëshiroj që personi që do të vijë në vendin tim te Bajerni, të jetë me një mentalitet pak a shumë si unë, Bajerni nuk është vetëm një skuadër futbolli. Është diçka më shumë, jemi një komunitet i madh në Gjermani që dashuron futbollin dhe jeton me të. Nuk dua një person që të vijë këtu me ju dhe të thotë që nuk më intereson basketbolli, edhe pse unë përfaqësoj një sport tjetër. Dua presidenti i ardhshëm i klubit të jetë largpamës, ashtu siç jam unë", u shpreh Hënes, që më pas vazhdon. "Këtu te Bajerni ka shumë vite që stafi bën një punë të shkëlqyer për të rritur imazhin e klubit, edhe unë jam njëri prej tyre, pavarësisht se më është dhënë mundësia të jem përfaqësuesi më i lart në klub, së bashku me Karl Hainc Rumenigen". Kujtojmë që vitet e fundit nuk kanë qenë shumë të lehta për Hënes që u akuzua për evazion fiskal dhe më pas u detyrua të kryente dy vite burg, pasi u shpall i fajshëm nga gjykata në Bavari. Ai gjithsesi u rikthye te Bajerni dhe tani vazhdon të jetë presidenti i klubit më të titulluar në Gjermani. Së bashku me Rumenigen, Hënes është njeriu më i rëndësishëm te Bajerni. Klubi nën drejtimin e tij ka fituar shumë tituj dhe dominon prej vitesh në futbollin gjerman. Së fundmi, drejtuesit po investojnë shumë në ndërtimin e një akademia cilësore ku si trajnerë janë përzgjedhur të drejtojnë skuadrat e moshave, ish- lojtarë të Bajernit. Miroslav Klose dhe Mehmet Sholl janë disa prej tyre. Pa harruar këtu edhe drejtorin sportiv në skuadrën e parë, Hasan Salihamixhiç, edhe ky një ish- lojtar i bavarezëve.