“Hileja” e Dajës: Skënderbeu është favorit
"S'ka vend për justifikime, me tifozët në krahë i mundim"
Ilir Daja tregohet "di nak" në prag të Fla murtari- Skënderbeu. Edhe pse luan në shtëpi dhe mbi të gjitha kur kundërshtari ka ndryshuar ndjeshëm nga vjet, ai ia lë presionin ish-ekipit. E kërkon fitoren me çdo kusht, por hapur e thotë që korçarët janë favoritë, duke qenë se vijnë me "kurorën" e kampionëve. Gjatë konferencës së dhënë dje për mediat, numri një i vlonjatëve u bën apel edhe tifozëve. Ai mendon se me lojtarin e 12-të në krahë, kuqezinjtë do të sigurojnë fitoren e tretë sezonale dhe rrjedhimisht blindimin e kreut të renditjes. "Ne kemi bërë dy transferta, ndërsa Skënderbeu ka pasur dy ndeshje brenda në shtëpinë e vet. Ata vijnë si favoritë në Vlorë, pasi janë ekipi kampion. Kanë një grup të konsoliduar tashmë në manovër, edhe pse kanë bërë disa ndryshime nga vjet. Por sërish duhet thënë që të rinjtë kanë qenë pjesë e Skënderbeut edhe sezonin e kaluar, këtu mund të bëjë përjashtim ndoshta vetëm Bregu. Një lojtar anësor tjetër cilësor, që mund të integrohet fare më mirë dhe më shpejt në manovrën sulmuese sesa një mesfushor tjetër. Megjithatë, nuk ka vend për justifikime. Duhet të futemi në ndeshje për ta vlerësuar maksimalisht kundërshtarin për elementët që kanë, por duke mos harruar veten. Në fund të fundit kemi një plus, pasi nesër (sot) kemi mbështetjen edhe të tifozëve tanë. Jemi një ekip ri taktikisht, por dëshira për ta fituar ndeshjen duhet të jetë në nivelet maksimale. Vetëm kam një porosi, nuk duhet të humbasim logjikën e kohës", tha fillimisht Daja.
SITUATA
Pavarësisht mungesave, tekniku i kuqezinjve evidenton se Flamurtari ka lojtarë profesionistë dhe me mentalitet fituesi. "Nëse do të përballeshim më vonë, mund të kishim më shumë lojtarë në dispozicion. Do të na mungojë Alla sepse është i dëmtuar, ndërsa Alvesh do ende kohë që të përshtatet me grupin. Megjithatë, kemi lojtarë me eksperiencë dhe mentalitet fituesi. Nëse luajmë si grup dhe me mbështetjen e tifozëve, besoj se do të shkojë mirë", tha trajneri. SKËNDERBEU
Ilir Daja ndalet edhe te Skënderbeu. Njohja sipas tij është reciproke, ndaj evidenton se askush nuk favorizohet dhe as penalziohet. "Do të jetë një njohje e përbashkët, ashtu sikundër lojtarët njohin një
pjesë timen si trajner, ashtu njoh edhe unë karakteristikat individuale të lojtarëve, pasi deri pak muaj më parë kanë qenë në drejtimin tim. E di që është një ndeshje e vështirë, pasi po t'i referohemi kampionatit të kaluar, ata kanë një mendësi pozitive, për shkak të përballjes direkte me ne. Por që ne kemi motivin për t'i ndryshuar gjërat dhe kjo është shumë e rëndësishme. Grupi posedon lojtarë me eksperiencë dhe dëshira për të vazhduar në këto javët e para është e madhe për të marrë nesër (sot) një fitore të mundshme", përfundon Daja.