Lika: Goli i shpejtë na favorizoi, po rritemi në lojë

Hasan Lika u kënaqet pikëve. Trajneri i Vllaznisë vlerëson kundërshtarin, por në fund të fundit mjaftohet me fitoren. Gjatë deklaratës së dhënë për "Panorama Sport", ai nuk shmangu as ndonjë kritikë për të tijtë dhe kryesisht për pjesën e parë të lojës. "E filluam mirë ndeshjen, pasi shënuam që në minutën e parë. Pas avantazhit, menduam për të ruajtur këtë rezultat. Nga ana tjetër, Burreli zhvilloi një ndeshje të mirë, jo vetëm në pjesën e parë, pasi deri në fund na vuri shpeshherë në vështirësi. Pjesa e dytë pati një ndryshim në lojën tonë e aq më tepër që filluam të punojmë më mirë me topin, kështu që në disa raste duhej të kishim shënuar golin e dytë sepse u rrezikuam pastaj edhe për ta barazuar ndeshjen, sidomos momenti i shtyllës së kundërshtarit, por edhe një rast tjetër. Gjithsesi, në harkun kohor të 90 minutave ishte një fitore e merituar", tha fillimisht numri një i pankinës shkodrane. Lika theksonte se skuadra po rritet, megjithatë pas kompletimit të grupit mendon se Vllaznia do të jetë edhe më mirë. "Mendoj që kemi një rritje. Sigurisht sot (dje) kemi vuajtur sepse kishim disa mungesa e lojtarë në gjendje jo të mirë si Krymi, Malota apo një qendërmbrojtës tjetër, të cilat ndikuan në ecurinë e lojës. Gjithsesi mendoj që u treguam gjatë gjithë kohës agresivë. U bë një luftë sportive nga të dyja skuadrat, pavarësisht që në ndonjë moment pati gjaknxehtësi. U zhvillua një ndeshje e fortë dhe e bukur nga të dy ekipet. Pjesën e dytë luajtëm më mirë, skuadra kishte shumë marrëdhënie të mira me topin, krijuam disa mundësi dhe arritëm pastaj që me vështirësi të shënonim golin e sigurisë", përfundoi trajneri i Vllaznisë.