Xhafa "sfidon" Cankën: E ndal unë!

Rikthehen përballjet me Egnatian pas 14 vitesh, mbrojtësi: Kapim kreun

Erjon Xhafa beson te vazhdimësia. Pas 4 pikëve të sigluara në start, një nga lojtarët më me eksperiencë të Lushnjës shprehet optimist edhe për transfertën me Egnatian. "Skuadra me rezultatet që ka marrë ka moral të lartë. Do të përgatitemi mirë përballë një kundërshtari që është vënë në krye të grupit. E kemi thënë që Lushnja luan çdo ndeshje për ta fituar dhe pse jo do tentojmë që të kapim vendin e parë. Egnatian e njohim shumë mirë. Ka një grup cilësor futbollistësh, të cilët janë shokët tanë dhe i njohim. Jo disa, por gati me të gjithë unë kam luajtur. Canka? Është një sulmues i rrezikshëm. Jemi shumë shokë. Nuk është hera e parë që jemi kundërshtarë në fushë. Na ka rastisur edhe herë të tjera, kur unë luaja me Lushnjën dhe ai me Luftëtarin. E njoh shumë mirë dhe do ta ndaloj", tha Xhafa. Rrogozhina është vetëm 16 kilometra në veri të Lushnjës. Kjo është transferta më e afërt, e cila do të shfrytëzohet edhe për kapur kreun e grupit. Pjesa më e madhe e lojtarëve të Lushnjës kanë luajtur më parë me Egnatian dhe anasjelltas. Sakaq, skuadra ka nisur përgatitjet nën drejtimin e Ilir Gjylës. Te verdhejeshilët pritet rikuperimi i peqinasit Eneo Sulkja, i cili shënoi që në debutim për Lushnjën. Mesfushori 25-vjeçar nuk luajti ndaj Orikut për një dëmtim muskulor dhe e ndoqi ndeshjen në tribunë. Peqinasi pritet të rikthehet në fushë të shtunën ndaj Egnatias.

Statistika - Lushnja zbret në "Hasan Zyla" të Rrogozhinës pas 14 sezonesh për të luajtur me Egnatian. Këto skuadra janë përballur për herë të fundit në Rrogozhinë në sezonin 20042005, në Kategorinë Superiore. Takimi i fazës së parë i luajtur më 23 tetor 2004 ka përfunduar 2-0 për lushnjarët me golat e shënuar nga Arlind Nora dhe Klodian Arbri. Ndërsa takimi i fazës së tretë i zhvilluar më 5 mars 2005 ka përfunduar pa gola. Lushnjarët nuk kanë asnjë humbje në Rrogozhinë, teksa njohin dy barazime dhe dy fitore. Alban Alushi