Kejn sfidon Interin: Dua t'i shënoj disa gola
Kapiteni i "Spërsave": Të përmbysim situatën dhe të fitojmë
Herri Kane ka hedhur pas shpine shqetësimet lidhur me formën e tij në prag të debutimit sezonal të Totenhemit në Ligën e Kampionëve kundër Interit, i parashikuar për sot në orën 18:55.
25-vjeçari ka shënuar dy gola në pesë ndeshjet e zhvilluara deri më tani në Kampionatin anglez, teksa në humbjen e së shtunës ndaj Liverpulit kaloi një pasdite të "qetë". Kjo, sepse sulmuesi mezi pret të rinisë të tundë rrjetat, aq më tepër nëse mbajmë parasysh shifrat e sezonit të kaluar kur ai realizoi një total prej 41 golash në të gjitha kompeticionet ku u aktivizua. Pavarësisht nga një verë e zënë nga impenjimet në Botërorin rus, kapiteni i Anglisë ka theksuar se është i aftë të luajë. Lajm ky, i konfirmuar edhe nga trajneri i "Spërsave", Maurisio Poçettino, i cili tha se do të ishte një "i çmendur" nëse do të mbante sulmuesin në stol në përballjen e sotme kundër Interit.
Gati - "Njerëzit gjithmonë kanë diçka për të thënë, veçanërisht kur një futbollist është pjesë e një ekipi të madh dhe ka detyrën për të dërguar topin në rrjetë. Si ekip, të gjithë mund të bëjmë më mirë, por si sulmues është normale që për mua të flitet pak më shumë, por ndihem i mprehtë dhe në formë, pasi, nëse nuk do të isha gati, asnjë trajner nuk do të më hidhte në fushë dhe nëse nuk do të isha menaxher, nuk do të më merrnin", - tha Kejn për britanikët e "The Sun". Bomberi e di se Poçetino e beson symbyllur dhe nuk kërkon të zhgënjejë teknikun argjentinas, e aq më pak shokët dhe tifozët: "Trajneri beson tek unë dhe unë besoj te vetja ime. Mendoj se mund të shënoj disa gola të martën dhe më pas të
flemë të qetë".
Me fitoret ndaj Njukasëllit, Fulhemit dhe Mançester Junajtidi dukej se sezoni i ri për ekipin nga Londra veriore kishte nisur në mënyrën më të mirë, por humbjet ndaj
Uotfordit dhe Liverpulit ridimensionuan gjithçka. Kejn e ka një shpjegim, teksa premton se "Spërsat" do të rinisin të ngjallin frikë te rivalët: "Ne do të kthehemi, vjet kemi qenë një nga skuadrat më të forta
dhe do të vazhdojmë të jemi edhe këtë sezon. Askujt nuk i pëlqen të humbasë në ndeshjet e mëdha dhe tani kemi një tjetër sfidë të madhe kundër Interit. Nëse fitojmë nesër (sot), do të shtojmë ndjeshëm besimin në mundësitë tona. Kur fitojmë dhe arrijmë të ruajmë ritmin, është pjesa me e bukur e kalendarit. Personalisht, do të mundohem të bëj punën time dhe të shënoj sa herë të më jepet mundësia. Detyra e të gjithëve është që të ndryshojmë momentin dhe të arrijmë rezultate përsëri".