Receta e Kesit: Ta nisim nga pjesa e dytë e Sardenjës
Afrikani, i pakënaqur me veten dhe ekipin
Frenk Kesi ishte rekordmeni i Milanit për minutat e luajtura në sezonin e kaluar. Afrikani theu edhe rekordin e minutazhit të Andrea Pirlos, duke u bërë pjesë e historisë kuqezi, por nuk janë statistikat apo meritat personale ato që e shqetësojnë. Mesfushori kërkon fitoret ekipore, duke nisur që nga kampionati, për të vazhduar në Serinë A. Pikërisht për ndeshjen e fundit ndaj Kaljarit, ku kuqezinjtë morën vetëm një pikë, 20-vjeçari deklaroi: "Ajo në Sardenjë ishte një ndeshje e komplikuar, jo vetëm për cilësinë e Kaljarit, por edhe për formën e tyre aktuale, e cila është në nivele maksimale. Falë përpjekjes në grup, arritëm të kthejmë rezultatin pjesërisht dhe u munduam deri në fund që të dilnim nga fusha me pikë të plota". Nëse te skuadra e sheh gotën gjysmë plot, nuk mund të thuhet e njëjta gjë për paraqitjen vetjake. Kesi ishte i pakënaqur me atë që dha në fushë mbrëmjen e së dielës dhe analizën e takimit sqaroi: "Në dhjetë minutat e para luajta shumë i qetësuar dhe bëra gabim. Ndihem mirë dhe po stërvitem fort, nuk e di përse hasa aq shuam vështirësi, gjithsesi qëllimi kryesor është që sa herë që luaj, të ndihmoj shokët e skuadrës". I ardhur nga Atalanta një sezon më parë, mesfushori nuk arrin të gjejë shpjegim për ndeshjen ndaj Kaljarit. Hidhërimi për mungesën e pikëve të plota ishte i dukshëm tek e gjitha skuadra, me afrikanin që u mundua të arsyetojë: "Jam tej
mase i hidhëruar për mënyrën sesi shkoi ndeshja ndaj Kaljarit. Donim të fitonim dhe u munduam shumë. Tani le të ulim kokën e të punojmë dhe në takimin e radhës të mundohemi të bëjmë një paraqitje si ajo e pjesë së dytë në Sardenjë! Çdo ndeshje është një histori më vete, fiton të shtunën ndaj Juves e mbase mundesh të mërkurën ndaj
Sasulos". Komenti i fundit i Kesit kishte të bënte me Higuainin. "Rrjeta e zhbllokoi, por nuk është se ishte në krizë. Për sulmuesit është gjithnjë e rëndësishme që të gjejnë rrugën e golit, mëkat i vërtetë që nuk arritëm të vendosnim më shpesh Higuainin në pozita për të rrezikuar. Kjo ndeshje duhet të na shërbejë si mësim për të ardhmen".