Kovaç: Në Lisbonë, për tri pikë
Kapiteni Nojer entuziast para Benfikës, duhet të luajmë njësoj si në kampionat
Trajneri i Bajernit të Mynihut, Niko Kovaç, ka qenë prezent në intervistën para ndeshjes së rëndësishme me Benfikën që do të luhet sonte në orën 21:00 në "Estadio da Luz" në Lisbonë. Kroati është shfaqur në një humor të mirë, kjo pasi skuadra e tij po kryeson kampionatin me pikë të plota pas tri javësh. Trajneri ka folur për lojtarët që ka në dispozicion dhe ata që nuk do të jenë në fushë në ndeshjen e sotme. "Kemi 16 lojtarë të shëndetshëm, kjo do të na mjaftojë të mbushim fushën e lojës dhe pankinën. Skuadra është mirë dhe do të japë gjithçka për të marrë një rezultat pozitiv ndaj Benfikës. Ka qenë një muaj jo i thjeshtë për ne, pasi humbëm shumë lojtarë cilësorë, por do t'ia dalim", u shpreh trajneri. Kujtojmë që Rafinja, Koman dhe Toliso nuk kanë udhëtuar për në Portugali, ata do të mungojnë me muaj të tërë. Trajneri Kovaç, më pas, i pyetur për rëndësinë e ndeshjes, përgjigjet: "Ndeshja e parë në grup është shumë e rëndësishme, pavarësisht se në çfarë kompeticion luan. Kemi ardhur këtu për të fituar". Në lidhje me portugezin Sançez Kovaç u shpreh se: "Ai ka bërë përmirësime të mëdha, sidomos në aspektin mendor është më i rritur. Lojtarëve të rinj duhet t'u japësh më shumë kohë për të treguar veten, atyre u duhet pak për t'u integruar në skuadër. Ai është shumë i gëzuar që ka ardhur në shtëpinë e tij, i uroj atij më të mirat".
NOJER: DUAM TRI PIKËT Kapiteni i Bajernit, Manuel Nojer, ishte së bashku me trajnerin Kovaç në konferencën për shtyp. Portieri i gjermanëve është optimist për suksesin e skuadrës së tij dhe beson se ajo do të arrijë të tregojë veten e saj. "Duam tri pikët, nuk kemi ardhur për pushime në Lisbonë. Në kampionat kemi bërë mirë dhe kështu duam të vazhdojmë edhe në Champions. Një fillim i mirë do të na e bënte më të lehtë rrugën tonë në Champions",
u shpreh Nojer. Ai është një lojtar shumë i rëndësishëm për Bajernin dhe kjo u vu re edhe në sezonin e kaluar,
ku ai mungoi pasi u dëmtua në fillim të sezonit, duke ndenjur për një kohë të gjatë jashtë fushave të lojës.