Shpëtim Duro: Ja pse vendosa të punoj në Kosovë
Shpëtim Duro është i bindur se mund të rinisë një karrierë të suksesshme nën drejtimin e klubit kosovar, Drita e Gjilanit. Pas aventurës në Maqedoni me Shkëndijën e Tetovës, Duro firmosi tri ditë më parë për Dritën dhe këtë fundjavë do të debutoi kundër Prishtinës, që drejtohet nga Mirel Josa. "Nuk kam vendosur menjëherë, sepse ka qenë një sezon i keq. Kriza ishte shumë e gjatë dhe kjo nuk është situatë pozitive. U binda se kontingjenti është i njëjtë nga viti i kaluar kur u shpallën kampion. Ngarkesa gjatë verës ndikoi disi, sepse Drita vinte nga një sezon i shkëlqyer, duke u shpallur kampione e Kosovës. Pranova sepse është respekt të marr ekipin kampion, por është edhe përgjegjësi. Kam pasur në skuadrat e mia në Shqipëri shumë lojtarë nga Kosova. Gjithmonë kam pasur respekt, sepse janë profesionistë. E kam ndjekur kampionatin kosovar prej dy- tri vitesh. Kam respekt për të gjithë, edhe për trajnerët, sepse kanë punuar në kushte shumë të vështira, pa ndonjë motivim, sepse Kosova nuk ka qenë në arenën ndërkombëtare. Ne kemi pasur avantazhin që kemi qenë të hapur dhe kemi eksperiencë të madhe", ka thënë fillimisht Duro për "SupeSport Kosova". I pyetur për situatën në ekip, ai shtoi: "Është krijuar një distancë me ekipet e tjera. Drita ka marrë shumë gola dhe duhet të punojmë në këtë aspekt. Kundërshtari i radhës, Prishtina, ka një skuadër cilësore. Dy ndeshjet e radhës janë shumë të rëndësishme. I kam ndjekur edhe derbit me Gjilanin, janë ndeshje si Partizani-Tirana", përfundoi Duro.