Alegri: “ AR” i do ta kishte shpëtuar Ronaldon
"Kristiano të përgatitet për rozinonen, ekipi më pëlqeu"
Masimiliano Alegri fton UEFA-n që të rimendojë përdorimin e "VAR"-it, sepse me teknologjinë, ndoshta Kristiano Ronaldo do ta kishte shmangur atë karton të kuq, në minutën e 29-të. "Sigurisht që 'VAR'-i do ta kishte ndihmuar arbitrin në marrjen e këtij vendimi. Të vjen keq kur mbetesh me 10 veta, pas 29 minutash, në Champions, për një episod si ai. Shpresojmë që të humbin Ronaldon vetëm për pak ndeshje, - shprehet trajneri i Juventusit, ndërsa mbi gjendjen e futbollistit të dalë në lot thekson. - Kristiano ndihet shumë keq për këtë përjashtim, por duhet gjithsesi ta kalojë dhe të përgatitet për ndeshjen e të dielës, kundër Frozinones. Sigurisht që situata si kjo të lënë një shenjë të hidhur, por unë pres reagimin më të fortë nga ana e tij. Skuadra nuk u trondit? Lojtarët e mi u treguan fantastikë, pavarësisht disavantazhit numerik. Juventusi, për një orë tregoi forcë dhe personalitet, duke sjellë në shtëpi tri pikë të rëndësishme. Deri në fund, rrezikuam pak, për të mos thënë asgjë. Pasi kaluam në avantazh 2-0 rrezikuam diçka, por është normale, ndonëse kur na u desh që të luanim ishim perfektë. Dalja me karton të kuq e Ronaldos e dërgoi përqendrimin e skuadrës në maksimum dhe kjo është diçka që më pëlqeu shumë, - vazhdon Alegri, që në fund nuk mund t'i shmangej një pyetje edhe për Dibalën. - Paulo do të kishte pasur hapësirën e tij kundër Valencias dhe do të kishte qenë një alternativë e rëndësishme, nëse nuk do të dëmtohej Khedira. Më pas ndodhi edhe kartoni i Ronaldos dhe më erdhi keq që më duhej ta lija jashtë Dibalën, ashtu sikurse më erdhi keq edhe për Kuadradon apo të tjerë që kishim mundësi të luanin".