Ringjallje apo thjesht një iluzion, përgjigjja vjen brenda dy javëve
Pas 6 vitesh mungesë, Interi rigjen dashurinë e humbur, Champions-in dhe e gjen me një përmbysje emocionuese, e cila për tifozët ka shijen e ringjalljes. "We are back" lexonte koreografia e shkëlqyer e tribunës veriore. "Ne u rikthyem" ishte britma e Vesinos dhe i gjithë "San Siros" pas vërshëllimës finale. Sepse mbrëmjen e së martës, kundër Totenhemit, zikaltrit nuk rigjetën vetëm kompeticionin më të rëndësishëm kontinental, por edhe një forcë mbi të gjitha psikologjike, e cila mund të sjellë një nisje të re, për një sezon që nuk e kanë nisur pikërisht në mënyrën më të mirë.
Turi i forcës - Por nëse pas një mbrëmjeje të tillë të vjen natyrshëm që të flasësh për "kthesë", "rigjetje mentaliteti" dhe "provë force" për skuadrën e Spaletit është po aq e vërtetë se do të jenë 14 ditët e ardhshme që do të vendosin nëse bëhej fjalë për një rast të izoluar apo për një ringjallje të vërtetë: transferta xhenoveze kundër Sampdorias është fiksuar për të shtunën, Fiorentina në mesjavë të martën dhe pastaj Kaljari (sërish në "San Siro") dhe PSV Eindhoven, respektivisht të shtunën më 29 dhe të martën më 3. Dy javë dhe katër ndeshje për të konfirmuar apo përgënjeshtruar entuziazmin zikaltër. Akoma për të përmirësuar - I takon Spaletit për t'i rikthyer të gjithë në binarë pas entuziazmit të Champions-it të rigjetur. Përmbysja e parë në Europë pas asaj të Inter-Barça dhe Bajern-Inter në 2010 erdhi në mënyrë të papritur dhe është e lehtë të heqësh tangenten e euforisë. Por trajneri e di që duhet shumë për të përmirësuar: "Ikardi dhe Naingolan duhet të kërkohen më shumë. Ata të dy janë unaza e një lidhjeje që na mungoi", tha trajneri toskan pas ndeshjes, por që as ai nuk i shpëtoi entuziazmit të përgjithshëm: "Jemi në rrugën e duhur. Ky rezultat na lë me një tjetër bindje për mundësitë tona".
Kujdes dhe entuziazëm - Kujdesi dhe entuziazmi për t'u kalibruar: është kjo sfida e madhe e dy javëve të ardhshme interiste. Për të ringritur kokën në kampionat do duhet përzierja e dy këtyre përbërësve. Grupi i Champions-it mbetet i hekurt, por Interi tregoi se mund t'i luajë shanset e veta me Barçën, Totenhemin dhe PSV-në. Në kampionat, me vetëm 4 pikë në 4 ndeshje, zikaltrit duhet të ndryshojnë marsh dhe mbi të gjitha të rikthehen të dhunojnë "San Siro"-n. Ndeshjet e ardhshme do të japin përgjigjet të besueshme (aq shumë të pritura nga tifozët).