Dy shkarkime te Luftëtari, Mezani është trajneri i ri
Tavo priti që slloveni të dorëhiqej, por nuk ndodhi. Vlonjati merr drejtimin e gjirokastritëve
Eliminim me turp nga Liga e Europës, katër humbje radhazi në startin e kampionatit, si kurrë më parë në historinë e Luftëtarit dhe mbi të gjitha një merkato e dështuar me kosto të jashtëzakonshme për klubin. Nga dje, trajneri Millosh Kostiç dhe drejtori teknik, Vangjel Çavo, nuk janë më pjesë e Luftëtarit. Presidenti Grigor Tavo ka pritur që Kostiç dhe Çavo t'i paraqisnin dorëheqjen, mirëpo kjo nuk ka ndodhur dhe ashtu siç kishte paralajmëruar "Panorama Sport", dje është urdhëruar një mbledhje urgjente. Gazeta mëson se Kostiç i ka kërkuar Tavos që t'i jepte edhe një shans, pra të drejtonte skuadrën në ndeshjen e radhës ndaj Teutës dhe nëse nuk fitonte, do të jepte vetë dorëheqjen. Mirëpo, pas bisedimeve për orë të tëra gjatë paradites së të mërkurës, palët kanë rënë dakord që të prishin kontratat me marrëveshje. Lajmi u konfirmua për gazetën nga burime zyrtare në klub. Kostiç kishte firmosur një kontratë 3-vjeçare me Luftëtarin, nga e cila përfitonte 3500 euro në muaj. Prishja me konsensus ka zbutur jo pak koston e klubit, por megjithatë slloveni ka rënë dakord që të paguhet deri në dhjetor. Pra, për 7 ndeshje që drejtoi Luftëtari nga periudha korrik-shtator, trajneri i larguar do të përfitojë rreth 21 mijë euro. Pas mbledhjes me drejtuesit, Kostiç ka drejtuar për herë të fundit Luftëtarit në seancën e djeshme, duke u përshëndetur me lojtarët.
TRAJNERI I RI - Gentian Mezani është trajneri i ri i Luftëtarit. Tavo i ka besuar stolin 38-vjeçarit vlonjat, që një sezon më parë drejtoi me sukses Laçin, duke e çuar në Europë
dhe finalen e Kupës së Shqipërisë. "Panorama Sport" ka paralajmëruar ardhjen e tij që më 2 shtator, kur Luftëtari humbi në shtëpi ndaj Flamurtarit me shifrat 0-1. Dje Mezani ka takuar presidentin e Luftëtarit dhe ka rënë dakord për të firmosur një kontratë
deri në fund të sezonit me opsion rinovimi. Synimi primar është largimi nga zona e ftohtë dhe më pas pretendimi për një vend në Europë. "Luftëtari do të rikthehet aty ku i takon. Nga sot nis ndryshimi. E falënderoj stafin e mëparshëm, por nuk ishte e thënë që gjërat të shkonin
ashtu siç e prisnim", deklaroi Tavo për gazetën. Sot Mezani do të bëjë prezantimin para skuadrës, duke pasur në dispozicion vetëm dy ditë për stërvitje në prag të debutimit me Teutën për javën e pestë, që do të luhet të shtunën në Gjirokastër.