Mezani: Luftëtari, jo për mbijetesë
Vlonjati është i bindur se ekipi do të reagojë që në takimin me Teutën
Luftëtari nga dje drej tohet nga vlonjati Gentjan Mezani. Në prani të presidentit gjirokastrit, Grigor Tavo, dhe zëvendëspresidentit Llambro Tavo është prezantuar për mediat në hollin e stadiumit "Gjirokastra" vlonjati Mezani. I pari që mori fjalën për prezantimin e Mezanit ishte presidenti Grigor Tavo, i cili fillimisht tha: "Nisur nga rezultatet e Luftëtarit dhe me dorëheqjen e trajnerit Millosh Kostiç vendosëm që në drejtimin e Luftëtarit të jetë trajneri Gentian Mezani". Pasi presidenti Tavo ka prezantuar për mediat teknikun e ri të Luftëtarit, vlonjati Gentjan Mezani të njëjtën gjë ka bërë dhe përballë lojtarëve në fushën e stadiumit "Gjirokastra" para seancës së djeshme stërvitore. Trajneri Mezani mësohet se u ka thënë lojtarëve të tij se Luftëtari i ka kualitetet dhe potencialet e mjaftueshme për të hedhur pas zhgënjimin e katër ndeshjeve të para. Pas prezantimit të shkurtër, trajneri
vlonjat iu përgjigj pyetjeve të drejtuara nga "Panorama Sport".
Profesor, çfarë ju bindi që në këtë moment zgjodhët Luftëtarin?
E pranova me dëshirë dhe erdha te Luftëtari, pasi më kanë folur për këtë skuadër dhe ambientin e mirë që ekziston brenda saj. Kjo ka qenë një dëshirë e hershme e imja që nga viti i kaluar. Me jep shpresë loja që bëjnë çunat e Luftëtarit, më jep besim puna e këtyre futbollistëve.
Cila është gjëja e parë që do kërkoni të ndryshoni në ekip?
Të shtunën kemi një ndeshje të vështirë. Asgjë nuk do të bëja më shumë në këto dy ditë, pasi gjithçka është psikologjike te lojtarët dhe nuk mund të ndryshojë asgjë nga ana taktike. Është e rëndësishme fillimi i një pune të re me rezultat pozitiv. Në futboll fiton dhe me një gol, pavarësisht lojës që interpreton.
Teuta, mendoni se është kundërshtari i duhur për ta nisur me fitore?
Teuta është një ekip që ka një mbrojtje të mirë. Ata kanë zhvilluar një futboll ofensiv, pavarësisht se nuk kanë shënuar shumë. Teuta është skuadër e mirë, ka lojtarë me eksperiencë, të cilët vrapojnë shumë. Nuk është për t'u neglizhuar, por jo e pamundur si skuadër. Si çdo ndeshje edhe ajo ka rëndësinë e saj për vetë pozitat që kemi në klasifikim. Unë shpresoj që ndeshjen e radhës të arrijmë një trepikësh të rëndësishëm. Në karakterin tim nuk më pëlqen të them me gojë fjalën mbijetesë. Kam marrë Laçin dhe Flamurtarin thuajse në të njëjtat pozicione, ndaj dhe duke filluar nga kjo javë (ndeshjen me Teutën) do të kërkojmë vetëm trepikëshin. Më pëlqen që gjithçka ta bëj mirë me lojtarët që kam në dispozicion. Çdo ndeshje është e vështirë, ndaj dhe në fushë futemi për ta fituar. Humbja nuk është e mirëpritur dhe Luftëtari do të hyjë në fushë siç e ka dhe emrin "luftëtar".
Cila është kontrata juaj? Keni ndonjë mesazh për tifozët gjirokastritë, të cilët ju kanë mirëpritur?
Pyetja juaj mendoj se është e ezauruar. Unë pres që këto ditë të më bashkohet edhe ndihmësi im italian, Franko Paskualeti. Sa i takon kontratës, kam biseduar me presidentin Tavo dhe mendojmë për projekte afatgjata. Ky do të jetë misioni im. Edhe një herë e përsëris se nuk bëhet fjalë për mbijetesën, por për të ngritur Luftëtarin atje ku i takon. E njoh mirë ambientin gjirokastrit dhe kulturën e tifozërisë së saj. I respektoj dhe vlerësoj për fjalët e mira që kanë thënë në emrin tim.