Stërvitja e fundit, Shehi i “fiksuar” me taktikën

Skënderbeu mbylli me një seancë të fundit përgatitjet për ndeshjen e sotme kundër Tiranës në Korçë. Nën drejtimin e trajnerit Orges Shehi, këtë seancë gjithçka iu kushtua taktikës dhe vendosjes së ekipit në fushë. Pas nisjes me ushtrime të lehta streçingu dhe hapësirës fizike të reduktuar, Shehi e përqendroi vëmendjen e tij te rreshtimi i ekipit dhe zbatimi me përpikëri i të gjitha lëvizjeve në fushë nga lojtarët. Pjesë e udhëzimeve të stafit ishte shpejtësia në aksionet sulmuese, por veçanërisht mbyllja në kohë e zonave të lira që mund të shfrytëzohen nga kundërshtarët. Në pjesën e dytë të përgatitjeve, trajneri u ndal te skemat e lojës dhe ndryshimit të tyre në raport të situatave të ndeshjes, si dhe provat në epërsi dhe disavantazh numerik gjatë kundërsulmeve. Nuk kishte si të mbeteshin pas për “detajistin” Shehi edhe goditjet standarde apo situatat 3 kundër 2 në sulmin bardhekuq dhe në mbrojtje. Në fund, gjithçka u mbyll me një test të shkurtër 10minutësh të një ndeshje me fushë të reduktuar për të mbyllur zyrtarisht përgatitjet anti-Tirana.

MUNGESAT

Dy mungesa do të ketë trajneri Shehi kundër Tiranës për sa i përket ekipit që do të jetë i grumbulluar në këtë takim. Bëhet fjalë për Bruno Ditën, i cili nuk ia ka dalë që të rikuperohet nga ai dëmtim i pësuar në Vlorë si dhe ka vijuar të stërvitet i diferencuar nga pjesa tjetër e grupit. Ndërsa, mungesa e dytë është ajo e Uerdi Marës, i cili është duke kaluar një gjendje gripale dhe për pasojë do të jetë jashtë ekipit për këtë takim. Kthehet në dispozicion të trajnerit Leonit Abazi që ka mbyllur pezullimin për shkak të kartonit të kuq, por edhe Ardit Hoxhaj që është bashkuar prej disa ditësh me grupin.