Presidenti Meta pret delegacionin kuqezi
Presidenti i Republikës së Shqipërisë, Ilir Meta, priti ditën e djeshme në ambientet e Presidencës, ekipin olimpik shqiptar që do të marrë pjesë në Lojërat Olimpike Rinore 2018, të cilat do të mbahen në Buenos Aires të Argjentinës nga data 6 deri më 18 tetor. Kreu i shtetit u uroi suksese sportistëve pjesëmarrës në këtë event dhe u shpreh kështu para tyre: "Dua t'ju shpreh sot mirënjohjen time për angazhimin serioz në përgatitjet për Lojërat Olimpike Rinore 2018. Me këtë rast dua t'iu shpreh fjalët më të mira, njëkohësisht edhe besimin për performancën tuaj të pritshme, që jo vetëm do t'ju rrisë ju si sportistë në këto sporte të bukura dhe të vështira, por urojmë që të ngrejë më lart autoritetin e vendit tonë në arenën sportive ndërkombëtare. Gjithmonë kam ndjekur me interes aktivitetet tuaja sportive, në të cilat keni shfaqur vlerat e rëndësishme të shpirtit të garës, sidomos në këto ngjarje sportive elitare. Me këtë rast ju uroj të jepni më të mirën, energjinë tuaj dhe aftësitë tuaja në garat ku do të garoni. Rezultati është njëra anë e suksesit tuaj, por kujtoni gjithmonë që sporti është një element i çmuar dhe i pazëvendësueshëm, që na ndihmon në rritjen e identitetit kombëtar, për të qenë sportistë të mirë dhe qytetarë të devotshëm. Dua t'iu uroj juve dhe familjeve tuaja suksese në Lojërat Olimpike Rinore dhe njëkohësisht të gjitha institucioneve sportive në vend të japin kontributin e tyre, moral dhe material për të krijuar një klimë të favorshme, për suksesin në pjesëmarrjen tuaj të rëndësishme", deklaroi presidenti Meta, i cili më pas i dorëzoi edhe flamurin kombëtar delegacionit kuqezi, ku flamurmbajtëse do të jetë boksieria Elsidita Selaj.