Lopetegui: Reali meriton notën 10
Sot Real-Espanjol, Hulen: Nuk jetoj me opinionet e të tjerëve, 100 ditë ikën shpejt
Hulen Lopetegui i vlerëson me notën 10, 100 ditët e tij te Reali i Madridit, por thotë se nota përfundimtare është më e rëndësishme. Tekniku i madrilenëve flet për kartonin e Ronaldos dhe kërkon që vëmendja e ekipit të përqendrohet tek Espanjoli.
Kalendari- "Është normale që kalendari të jetë i tillë. Për një skuadër që luan në Champions nuk ka rrugë tjetër. Duhet ta përballojmë me qetësi dhe me vendosmëri për të marrë pikët maksimale".
I kuqi Ronaldos- "Nuk e kam parë në momentin që ndodhi, por pashë disa foto më vonë. E gjithë bota më tha se nuk ishte karton i kuq. Gabimet ndodhin ndonjëherë dhe VARi do të na ndihmonte. Nuk më takon të flas më shumë për këtë çështje. Nuk e di nëse do t'i jepnin të kuq nëse do të luante me fanellën e Realit".
100 ditë- "Ikën shumë shpejt dhe pa u kuptuar. Notat për sezonin vendosen në fund si në universitet apo në shkollë. Për momentin skuadrës i vë një 10të për mënyrën sesi ka punuar dhe vendosmërinë që ka pasur gjatë ndeshjeve. Pjesa tjetër vlerësohet në fund".
Espanjoli- "Do të jetë një ndeshje shumë e luftuar. Ata janë përmirësuar shumë dhe janë kompletuar gjatë kësaj kohe. Për më tepër kanë pasur në dispozicion gjithë javën për të punuar".
Roma- "Unë nuk jetoj me opinionet e njerëzve nëse ishte ndeshje e mirë apo e keqe. Por i bëj vetë analizat. Ekipi bëri një ndeshje shumë të mirë, por gjithmonë ka gjëra për t'u korrigjuar. Ajo tani është ndeshje e së kaluarës dhe të mendojmë për tjetrën".