Ronaldo gjen partnerin ideal, Alegri: Nuk falim
Tani frymëzon edhe Ronaldon, kështu lindi “Ronaldeski”
Mbërriti te Juventusi me një “look” prej modeli, me flokët e prera në një mënyrë moderne, të kthyera në anë dhe plot xhelatinë, e cila nuk mungonte as në stërvitje, por këtë verë, papritur, Federiko Bernardeski vendosi t’i presë shkurt ato, duke ofruar një pamje prej marinsi. Dhe faktet tregojnë se sivjet është shndërruar realisht në një ushtar në shërbim të “Zonjës”, “kavalieri” i parë nën urdhrat e “mbretit” Kristiano. Fundja, te Juventusi lojtarët i pëlqejnë kështu: të bindur, të rafinuar dhe gati për të vrapuar edhe më shumë se të tjerët. Një shpërthimin që ka pasur sivjet “FB 33”, i cili kuptohet qartësisht me sy në statusin e tij bardhezi, është ky soliditet psikologjik që ai ka gjetur. Papritur, Bernardeski ka ditur që të justifikojë me daljet e fundit ato 40 milionë eurot që tashmë duken se janë shumë pak për një si ai. Edhe pse vjet çeku që drejtori Marota i firmosi Fiorentinës për kartonin e tij, u quajt një ekzagjerim nga ana e mjaft skeptikëve, mjaftoi vetëm një vit që Bernardeski, mbi të cilin stafi i Alegrit punoi mbi muskujt, taktikën dhe mentalitetin, të tregojë se tashmë vlen të paktën dyfish. Dhe ai që garanton dhe sponsorizon këtë vlerë është as më shumë e as më pak se Kristiano Ronaldo, i cili ka zgjedhur pikërisht Bernardeskin si partner në “krimin” që të dy kanë vendosur t’u bëjnë kundërshtarëve që u dalin përpara. Në vetëm pak javë, sintonia mes të dyve ka shpërthyer në fushë: e kërkojnë, ndihmojnë dhe e festojnë njëri-tjetrin, por në të njëjtën kohë, sekreti i kësaj sintonie është miqësia që ka lindur edhe jashtë fushe. Duke parë atë që të dy kanë mundur të bëjnë në këtë fillimkampionati, planeti bardhezi harroi
dyshen “Dybaldo” dhe nuk ka vonuar që këtë të radhës ta pagëzojë si “Ronaldeski”, dy superheronj që vendosën të bashkojnë forcat dhe miqësinë, pas një darke plot të qeshura në një restorant, në qendër të Torinos. Kura “Alegri”
Mund të ketë qenë edhe fakti
që Bernardeski, ndryshe nga sivjet, kishte dy sezone radhazi që nuk zhvillonte një fazë përgatitore të plotë, i përndjekur shpesh nga dëmtimet, por siç e tha edhe Alegri: “Bernardeski tashmë ka fituar atë superfuqi fizike dhe mendore për të luajtur dhe kuptuar sesi të sillesh
në një skuadër të madhe”. Këtë verë, ai ishte i pari që u paraqit në ditën e grumbullimit dhe frytet duken: gol fitoreje në Verona, 13 kilometra në “thrillerin” e Valencias dhe një hyrje prej lideri ndaj Frozinones, duke thyer ndeshjen dhe murin e verdhë, duke frymëzuar lëvizjet
e Ronaldos në fushë dhe duke blinduar tri pikët me golin e dytë personal në Serinë A. Edhe vjet, “Berna” ishte në rrugën e duhur për të fituar më shumë hapësirë te Juvja, por krisja në gju bëri të vetën, ndonëse stafi mjekësor shmangu operacionin dhe me
durimin e lojtarit bënë që terapia të ishte disi më e gjatë, por më e sigurt. Në këtë mënyrë, këtë vit Bernardeski, futbollisti serfist që është i apasionuar edhe ndaj kitarës, po merr për dore Juven, me kurajën e një marinsi, së bashku me mikun e tij të ri, Ronaldo.