Vora, 567 kilometra për... pikë

Te Vora është rikthyer besimi dhe optimizmi pas asaj pikë të parë të marrë ndaj fushë- krujasve të shtunën e kaluar. Kjo javë do të jetë më se e ngarkuar për skuadrën vorake, jo nga pritshmëritë e rezultateve sesa nga udhëtimet që kjo skuadër do të bëjë kësaj jave. Ata sot do të udhëtojnë drejt Gjirokastrës, rreth 210 kilometra rrugë, ku do të zhvillohet ndeshja e kthimit për Kupën e Shqipërisë. Siç dihet, takimi i parë pothuajse e ka zgjidhur përfundimisht skuadrën kualifikuese, e cila është Luftëtari që pas fitores 4-0 në Yrshek. Një tjetër udhëtim sfilitës e pret këtë skuadër në takimin për kampionatin e Kategorisë së Parë, që shkon në 205 km. Ndeshja mes tyre dhe Korabit do të jetë ajo, tek e cila është përqendruar e gjithë vëmendja e skuadrës. Kështu që Vora po përgatitet më shumë për këtë takim ku dhe do të kërkojë pikë në ndeshjen e Peshkopisë. Trajneri po përgatit dy formacionet që do të luajnë gjatë kësaj jave.

ÇANI - Trajneri i Vorës, Gerald Çani, lidhur me këto dy takime u shpreh: "Ne nuk kemi pasur në objektiv eliminimin e Luftëtarit, përveçse një paraqitje konkurruese e dinjitoze. Më shumë vëmendja jonë është e përqendruar te kampionati, ku kërkojmë të japim maksimumin dhe të realizojmë objektivin që kemi. Renditjen në fund të dy fazave të para në 5-shen e parë të grupit, për të siguruar matematikisht qëndrimin tonë dhe në sezonet e tjera të mendojmë edhe për më tej. Në ndeshjen e Kupës do të përpiqemi të afirmojmë të tjerë lojtarë, ku dhe ne të bindemi për gjendjen e tyre, që më pas t'i aktivizojmë dhe në kampionat". Abdulla Dushku