Doksani: Ky Bylis për Superiore, talente në modë te klubi ynë

Ballshiotët janë skuadra që në Kategorinë e Parë po shesin edhe lojtarë. Rasti i Niko Zisit do të vazhdojë edhe më të tjerë talente vendës, por edhe të huaj, që te Bylisi i këtij sezoni janë të shumtë. Emrat e Dramollit, Muratajt, Doksanit, Mahmutajt, Samnda, Antoni, Liçkollari, Zefi e ndonjë tjetër shumë shpejt mund të jenë ata që do të impresionojnë edhe skuadra elitare. Elis Doksani është rikthyer këtë verë në Ballsh, aty ku në Superiore në moshën 18-vjeçare ka debutuar dhe ka luajtur edhe 90 minuta si titullar ndaj Partizanit. Por, tashmë historia është ndryshe. Doksani vjen si lojtar i Shpresave U-21 dhe ka luajtur si titullar në javët e fundit: “Unë jam me origjinë nga Mallakastra dhe e kam për nder që rikthehem këtu, është shtëpia ime dhe do të mundohem që të jap më të mirën. Jam shumë i motivuar këtë sezon edhe në sajë të eksperiencës që kam fituar te Dinamo, ku vjet luajta për një sezon si titullar. Ballshi ka një mision këtë sezon, rikthimin në Superiore. Ka konkurrencë por do t’ia dalim. Unë jam i bindur se ky do të jetë sezoni ynë. Duke luajtur te Bylisi si titullar, jo vetëm mbaj vendin te Shpresa, por edhe rritem më shumë profesionalisht. Talentet janë gjithmonë prioritet në klubin tonë, ndaj edhe unë kam besim se këtë sezon do të kemi sukses. Nesër (sot) do të fitojmë ndaj Tomorit dhe do të kualifikohemi, sepse e kemi vlerësuar shumë këtë ndeshje, ndërsa në fundjavë do të shkojmë në Kavajë për të marrë 3 pikët”, ka thënë mbrojtësi i Bylisit, Elis Doksani. Erjon Saliu