Miho: Kualifikohemi dhe matim forcat me Kukësin
Apolonia / Trajneri, i bindur për kalimin e turit të parë në Kupë
Fierakët kanë zhvilluar analizën e ndeshjes me Bylisin, ku trajneri Miho ka ngritur tonin e zërit në drejtim të lojës dhe frikës që skuadra e tij ka shfaqur në fushë në episode të ndryshme. Mbi të gjitha, Miho e ka drejtuar tehun e kërkesës së llogarisë ndaj lojtarëve të përvojës, të cilëve u ka kërkuar që të jenë më ndikues për ta tërhequr skuadrën “për dore” drejt suksesit. Gjithsesi, kryepankina fierake ka shprehur edhe besimin e plotë që ka tek ekipi dhe i ka motivuar lojtarët e tij për të dyja ndeshjet e kësaj jave: për Kupë ndaj Pogradecit dhe për kampionat ndaj Elbasanit në fundjavë. Sot do të luhet ndeshja e kthimit të turit të parë të Kupës së Shqipërisë dhe fierakët do të presin liqenorët e Pogradecit. Në takimin e luajtur në “Gjorgji Kyçyku” Apolonia ka fituar 1-0 dhe ky rezultat e favorizon ekipin e Mihos, ndaj dhe trajneri fierak ka vendosur të bëjë ndryshime në formacion, duke u dhënë hapësira futbollistëve që janë aktivizuar më pak minuta. “Pak rëndësi ka se deri ku mund të shkojmë në Kupë, pasi ne kemi synime të qarta në kampionat”, thotë trajneri i Apolonisë. “E rëndësishme është që të luajmë sa më shumë ndeshje, pasi kjo gjë i shërben rritjes së skuadrës dhe ngjitjes së saj në nivelin e duhur. Do të luajmë për fitore ndaj Pogradecit dhe në këtë ndeshje do të kenë mundësi të tregojnë vlerat e tyre lojtarët që nuk janë aktivizuar shumë gjatë këtij sezoni. Pas Pogradecit, nëse kualifikohemi, na pret Kukësi dhe për ekipin do të jenë dy ndeshje shumë të vlefshme, pasi ballafaqime të tilla me ekipe elitare të Superligës i shërbejnë skuadrës sonë, e rrisin, e pjekin dhe e forcojnë”. Bujar Rama