Maldini dikton merkaton: Na duhen lojtarë të mëdhenj

Drejtori i Milanit u bën apel drejtuesve të klubit

Kohë ka ende, por për të bërë hapin ose më saktë atë kërcimin e lartë për të luftuar pa frikë për pozicionet e larta e më pas për të synuar rikthimin te trofetë, nuk duhet të vonojë shumë. Për këtë arsye, drejtori i zonës sportive të Milanit, Paolo Maldini, nuk kërkon të fshihet dhe u bën një apel të qartë investitorëve amerikanë, pas barazimit 2-2 të pësuar kundër Atalantës, nga salla e ceremonive së "FIFA Best Awards": "Do të na duhet kohë për t'u rritur, por shpresojmë që ta bëjmë në periudhën më të shkurtër të mundshme. Na mungojnë ende disa lojtarë të rëndësishëm, për të bërë atë ndryshim pozitiv në mentalitet, sepse fundja janë kampionët e mëdhenj ata që të shtyjnë të ndryshosh frymën e grupit, shtojnë eksperiencën për të arritur te fitoret e mëdha. Lojtarë si Higuaini? Pikërisht si ai, ndonëse nuk është vlera e kartonit të tyre ajo që na sjell fitoret, por cilësia dhe eksperienca që kanë. Objektivi Champions? Po dhe ne besojmë se mund të arrijmë në katër vendet e para. Skuadra duhet të besojë te ky objektiv dhe jo vetëm sepse shtyhet nga ambienti i jashtëm, por sesa e ka detyrim për traditën e Milanit. Sigurisht që nuk duhet të harrojmë periudhën e errët që kemi kaluar. Edhe ndeshje si ajo me Atalantën mund t'i ndodhin çdo skuadre, por personalisht di të them se grupi nuk duhet të demoralizohet, sepse duke parë përreth, përveç Juventusit që bën një kampionat më vete, nuk shoh skuadra që kanë një nivel më të lartë sesa ne, prandaj Milani është i detyruar që të luftojë deri në sekondën e fundit të këtij kampionati për zonën Champions".