Mesi votoi Ronaldon, ndërsa Kielini injoroi Maks Alegrin
Votat e çmimit “The Best” lënë gjithmonë dyshime dhe ndonjëherë janë të vështira për t’u kuptuar. Por ndryshe nga herët e tjera, këtë herë trendi ka qenë ndryshe. Gazeta “Marca” zbulon 10 votat më interesante për të kuptuar se kapitenët, trajnerët, por edhe gazetarët këtë herë nuk votuan sipas dëshirave, njohjeve apo miqësive. Vota e tyre bazohej deri diku në logjikën e asaj që përfaqësonin lojtarët e nominuar.
Roberto Martinez- Trajneri belg kishte mundësinë që të votonte dy lojtarët e tij De Bryjne dhe Hazard sepse ishin mes 10 kandidatëve, por ai i ndau votat e tij në këtë mënyrë: Modriç, Varan dhe Mesi.
Eden Hazard- E njëjta logjikë edhe për kapitenin e Belgjikës, Eden Hazard. Ai nuk e zgjodhi shokun e tij Kevin De Bryjne. Votat e tij ishin për Modriçin, Varanin dhe Mbapenë. Pak a shumë të njëjta me të trajnerit të tij.
Serxho Ramos- I çuditshëm vendimi i kapitenit të Spanjës për të mos i dhënë asnjë pikë shokut të repartit Rafael Varan, i cili i shpalli kampion Europe me Realin dhe kampion bote me Francën. Votat e tij ishin për: Modriçin, Ronaldon dhe Mesin.
Garet Sauthgejt- Surprizën e bën trajneri i Anglisë, i cili nuk votoi lojtarin e vetëm anglez në listë, Herri Kejnin. Tre të zgjedhurit e tij ishin: Modriç, Varan dhe Hazard.
Gazetari argjentinas- Tërheqin vëmendjen edhe votat e gazetarit argjentinas, Enrike Makaja Markez. Ai nuk i ka dhënë asnjë pikë Mesit. Votat e tij ishin për Modriçin, Grizmanin dhe Ronaldon. Gazetari belg- Ashtu si gazetari belg, Kristof nuk i votoi dy bashkëkombësit e tij, De Bryjne dhe Hazard. Ai zgjodhi Ronaldon, Mesin dhe Modriçin. Edhe si trajneri më i mirë zgjodhi Guardiolën, Zidanin dhe Deshampin.
Xhorxho Kielini- Mbrojtësi i Juventusit nuk votoi për trajnerin e tij Masimiliano Alegri si më të mirin e vitit. Kapiteni i Italisë votoi për Deshampin, Zidanin dhe Sauthgejtin.
Leo Mesi- “Pleshti” votoi për herë të parë Kristiano Ronaldon, duke i dhënë një pikë. Ai votoi Modriçin dhe Mbapenë në vendin e parë dhe të dytë.